चिपळूण: शहरातील गोवळकोट आणि पेठमाप परिसरातील रहिवाशांना गेल्या अनेक दिवसांपासून भेडसावणाऱ्या मचूळ पाण्याच्या समस्येची गंभीर दखल घेत चिपळूणचे नगराध्यक्ष उमेश सकपाळ यांनी प्रत्यक्ष घटनास्थळी जाऊन संयुक्त पाहणी केली. नागरिकांना लवकरच स्वच्छ व शुद्ध पिण्याचे पाणी उपलब्ध करून देण्याच्या उद्देशाने त्यांनी नगरपरिषदेचे अधिकारी आणि ग्रॅव्हिटी पाणी योजनेच्या ठेकेदारांसोबत संपूर्ण पाणीपुरवठा यंत्रणेची प्रत्यक्ष जागेवर जाऊन तपासणी केली. यावेळी उपनगराध्यक्षा रुपाली दांडेकर, स्थानिक नगरसेवक, नगरपरिषदेचे संबंधित तांत्रिक अधिकारी, योजनेचे ठेकेदार तसेच परिसरातील नागरिक मोठ्या संख्येने उपस्थित होते. पाहणीदरम्यान उपस्थित पदाधिकाऱ्यांनी स्थानिक रहिवाशांशी थेट संवाद साधून त्यांच्या अडचणी व तक्रारी समजून घेतल्या.
या दौऱ्यात मचूळ पाणी नळांना येण्यामागील मूळ तांत्रिक कारणे, विद्यमान पाणीवाहिन्यांची सद्यस्थिती आणि पाणीपुरवठा वितरणातील त्रुटींवर सविस्तर चर्चा करण्यात आली. नागरिकांना भेडसावणारी ही समस्या तात्पुरती न सोडवता त्यावर कायमस्वरूपी उपाययोजना करण्याच्या स्पष्ट सूचना नगराध्यक्षांनी संबंधित यंत्रणेला दिल्या. तसेच ग्रॅव्हिटी पाणी योजनेच्या उर्वरित प्रलंबित कामांचा सविस्तर आढावा घेत ती विहित मुदतीत व वेगाने पूर्ण करण्याचे निर्देश देण्यात आले. पाणीपुरवठा हा नागरिकांचा मूलभूत अधिकार असल्याने त्यात कोणतीही हलगर्जी खपवून घेतली जाणार नाही, असे नमूद करत संबंधित ठेकेदार आणि अधिकाऱ्यांनी परस्परांमध्ये समन्वय ठेवून काम करावे, असे नगराध्यक्ष उमेश सकपाळ यांनी बजावले. चिपळूण नगरपरिषद प्रशासन नागरिकांच्या मूलभूत गरजा भागवण्यासाठी कटिबद्ध असून लवकरच हा प्रश्न मार्गी लावला जाईल, अशी ग्वाही यावेळी देण्यात आली. या प्रत्यक्ष पाहणीनंतर आता प्रशासकीय यंत्रणा नेमकी कोणती जलद पावले उचलते आणि परिसरातील नागरिकांची मचूळ पाण्याच्या त्रासातून कधी कायमची मुक्तता होते, याकडे संपूर्ण परिसराचे लक्ष लागले आहे.
