चिपळूण (प्रतिनिधी): वाढती आर्थिक मंदी, ऑनलाइन खरेदीचे संकट, दुष्काळजन्य परिस्थिती, वाहतूक कोंडी, पार्किंगची डोकेदुखी आणि परप्रांतीय फिरत्या विक्रेत्यांचा सुळसुळाट यामुळे चिपळूणच्या स्थानिक बाजारपेठेची गेल्या सहा ते आठ वर्षांत उलाढाल कमालीची घसरल्याची गंभीर चिंता व्यक्त करत, शेतकऱ्यांप्रमाणेच आर्थिक संकटात सापडलेल्या स्थानिक व्यापाऱ्यांना दिलासा देण्यासाठी शासनाने ठोस उपाययोजना कराव्यात, असा रोखठोक सवाल चिपळूण व्यापारी महासंघटनेने उपस्थित केला आहे. वाढते कर, घरपट्टी, व्यावसायिक वीजबिले, जीएसटी, सीजीएसटी, आयकर, परवाना नूतनीकरणाचा खर्च आणि बँक कर्जांचे नियमित हप्ते अशा चौफेर आर्थिक बोज्याखाली दबलेला व्यापारी वर्ग सकाळी नऊ ते रात्री नऊ असे बारा तास दुकानात थांबूनही अपेक्षित व्यवसाय होत नसल्याने तीव्र आर्थिक आणि मानसिक तणावाखाली आला आहे.
शेतकरी जगला पाहिजे तसाच व्यापारीही जगला पाहिजे, त्यामुळे व्यापाऱ्यांचे कुटुंब, कर्ज आणि जबाबदाऱ्या लक्षात घेऊन शासनाने विविध करांमध्ये सवलत किंवा शिथिलता देण्याबाबत सकारात्मक भूमिका घ्यावी, अशी आग्रही अपेक्षा महासंघटनेने व्यक्त केली आहे. दिवाळीच्या सणाच्या पार्श्वभूमीवर स्थानिक बाजारपेठेत पुन्हा चैतन्य निर्माण करण्यासाठी आणि ग्राहकांना आकर्षित करण्यासाठी महासंघटनेच्या वतीने शहरात विविध ठिकाणी लक्षवेधी स्वागत कमानी उभारण्यात आल्या असून, चिपळूणचे गतवैभव परत मिळवण्यासाठी नागरिकांनी अधिकृत स्थानिक व्यापाऱ्यांकडूनच खरेदी करावी, असे भावनिक आवाहन करण्यात आले आहे.
या जनजागृती मोहिमेचा प्रसार प्रत्येक व्यापाऱ्याने व्हॉट्सॲप स्टेटस, इन्स्टाग्राम, फेसबुक आणि एक्ससारख्या सोशल मीडियाच्या माध्यमातून करण्याचे ठरवले असून, या उपक्रमात महासंघटनेचे अध्यक्ष किशोर रेडीज, सचिव उदय ओतारी, कार्याध्यक्ष सूर्यकांत चिपळूणकर, सल्लागार बापूसाहेब काणे, उमेश काटकर, खजिनदार शैलेश सावंत, जनसंपर्क अधिकारी श्रीनाथ खेडेकर यांच्यासह सर्व सदस्य व संलग्न ३१ संघटना सक्रिय सहभागी झाल्या आहेत; दरम्यान, दिवाळी व भाऊबीज संपन्न झाल्यानंतर व्यापारी बांधवांचा एक भव्य मेळावा आयोजित करून शासन प्रतिनिधी व प्रशासकीय अधिकाऱ्यांसमोर रोजगारनिर्मिती, पर्यटन विकास, वाहतूक-पार्किंगच्या समस्या आणि स्थानिक व्यापाराला चालना देणाऱ्या ठोस मागण्या अधिकृतपणे मांडण्यात येणार आहेत.
