लांजा : तालुक्यातील इंदवटी जाधववाडी येथून पुण्याला जात असल्याचे सांगून घरातून बाहेर पडलेला २३ वर्षीय तरुण अद्याप घरी परतला नसल्याने खळबळ उडाली आहे. स्वप्निल धनंजय जाधव असे बेपत्ता तरुणाचे नाव असून, त्याला अज्ञात व्यक्तीने फूस लावून पळवून नेल्याची तक्रार त्याच्या काकू सुवर्णा जाधव यांनी लांजा पोलीस ठाण्यात दिली आहे. या प्रकरणी पोलिसांनी अज्ञात व्यक्तीविरोधात अपहरणाचा गुन्हा दाखल केला आहे.
पोलिसांनी दिलेल्या माहितीनुसार, स्वप्निल जाधव हा ३१ ऑक्टोबर २०२६ रोजी दुपारी ३ वाजण्याच्या सुमारास इंदवटी जाधववाडी येथून पुण्याला जात असल्याचे सांगून घरातून निघून गेला होता. मात्र, तो अद्याप घरी परतला नसल्याचे समोर आले. त्यानंतर त्याच्या नातेवाइकांनी शोधाशोध केली. स्वप्निल याला फिर्यादीच्या संमतीशिवाय अज्ञात व्यक्तीने फूस लावून अज्ञात कारणास्तव पळवून नेल्याचा संशय व्यक्त करण्यात आला आहे.
स्वप्निल धनंजय जाधव (वय २३) हा व्यवसायाने चालक असून, सध्या तो गोटवडे फाटा, मावली निगते वस्ती, तालुका मुळशी, जिल्हा पुणे येथे राहत होता. त्याचे मूळ गाव इंदवटी जाधववाडी, तालुका लांजा, जिल्हा रत्नागिरी आहे.
या प्रकरणी लांजा पोलीस ठाण्यात गुन्हा रजिस्टर क्रमांक २८४/२०२६ अन्वये भारतीय न्याय संहिता २०२३ च्या कलम १४०(३) अंतर्गत गुन्हा दाखल करण्यात आला आहे. बेपत्ता तरुणाचा शोध घेण्याच्या दृष्टीने पोलीस पुढील तपास करत आहेत.
