वाढदिवसानिमित्त खेड तालुक्यात उभारणार २५ वनराई बंधारे
खेड : यंदा राज्यावर दुष्काळाचे मोठे सावट असून बळीराजा गंभीर आर्थिक व नैसर्गिक संकटाचा सामना करत आहे. या गंभीर परिस्थितीची जाणीव ठेवून भारतीय जनता पार्टीचे नेते तथा खेड नगर परिषदेचे माजी नगराध्यक्ष ॲड. वैभव खेडेकर यांनी यंदाची दिवाळी साजरी न करण्याचा संवेदनशील निर्णय घेतला आहे. सण-उत्सवांवर होणारा वायफळ खर्च टाळून तो संपूर्ण निधी दुष्काळग्रस्त शेतकऱ्यांच्या मदतीसाठी आणि समाजोपयोगी उपक्रमांसाठी वापरण्याचा संकल्प त्यांनी जाहीर केला आहे.
दुष्काळी परिस्थितीचे गांभीर्य लक्षात घेत २९ नोव्हेंबर रोजी येणारा आपला वाढदिवसही कोणत्याही स्वरूपात साजरा न करण्याचा निर्णय ॲड. खेडेकर यांनी घेतला आहे. खेड तालुक्यात आगामी जानेवारी आणि फेब्रुवारी महिन्यांत पाणीटंचाईची तीव्र समस्या उद्भवण्याची दाट शक्यता आहे. या संभाव्य संकटाची आगाऊ दखल घेत वाढदिवसाचे औचित्य साधून तालुक्यात दुष्काळ निवारणाचा ठोस उपक्रम राबविण्याचा निर्धार त्यांनी व्यक्त केला आहे. या अंतर्गत खेड तालुक्यातील तीव्र पाणीटंचाईग्रस्त गावांमध्ये स्वखर्चाने २५ वनराई बंधारे उभारण्यात येणार असून, गरजू गावांमध्ये तातडीने ही कामे हाती घेतली जाणार आहेत.
या लोककल्याणकारी उपक्रमामुळे ग्रामीण भागातील जलपातळी वाढण्यास मदत होईल आणि भविष्यातील पाणीप्रश्न काही प्रमाणात हलका होण्यास हातभार लागेल, असा विश्वास त्यांनी व्यक्त केला आहे. आगामी काळात दुष्काळाची तीव्रता वाढण्याची शक्यता असल्याने सर्व नागरिक, राजकीय कार्यकर्ते आणि सामाजिक संस्थांनी मतभेद बाजूला ठेवून एकत्र यावे, असे आवाहन त्यांनी केले आहे. राज्याचे नेतृत्व करत असलेल्या दुष्काळ निवारण मोहिमेला लोकसहभागाची जोड दिल्यास या नैसर्गिक संकटावर प्रभावीपणे मात करता येईल, असेही त्यांनी नमूद केले. यंदाची दिवाळी आणि वाढदिवस हा जल्लोष म्हणून नव्हे, तर समाजसेवेचे पर्व म्हणून साजरा करत बळीराजाला थेट दिलासा देण्याचा हा संवेदनशील प्रयत्न सर्वसामान्य जनतेच्या सेवेसाठी समर्पित असल्याचे ॲड. खेडेकर यांनी स्पष्ट केले असून, त्यांच्या या निर्णयाचे तालुक्यासह संपूर्ण जिल्ह्यात स्वागत होत आहे.
