चिपळूण : महानगरांमध्ये उपलब्ध असणाऱ्या मोठ्या संधींना बाजूला ठेवून आपल्याच जन्मभूमीत दर्जेदार आरोग्यसेवा देण्याचा संकल्प घेतलेल्या चिपळूण येथील प्रसिद्ध त्वचाविकार व लेसर तज्ज्ञ डॉ. यतीन जाधव आणि भूलतज्ज्ञ तसेच औद्योगिक आरोग्य चिकित्सक डॉ. वैशाली जाधव यांना एबीपी माझा वृत्तवाहिनीच्या मानाच्या ‘आरोग्यरत्न’ पुरस्काराने गौरविले जाणार आहे. गेल्या ३० वर्षांहून अधिक काळ त्यांनी आरोग्य क्षेत्रासोबतच सामाजिक, शैक्षणिक आणि सांस्कृतिक पटलावर बजावलेल्या उल्लेखनीय कामगिरीची दखल घेऊन हा सन्मान जाहीर करण्यात आला आहे.
डॉ. यतीन जाधव यांनी त्वचाविकार, सौंदर्यशास्त्र आणि लेसर उपचारांचे उच्च शिक्षण मुंबई, दिल्लीसह विदेशातून पूर्ण केले. आधुनिक वैद्यकीय तंत्रज्ञानाचा लाभ स्थानिक कोकणवासीयांना मिळावा या हेतूने त्यांनी चिपळुणात ‘स्प्रिंग स्किन क्लिनिक अँड लेसर इन्स्टिट्यूट’ची उभारणी करून आरोग्य क्षेत्रात नवीन मानदंड प्रस्थापित केले. याशिवाय अपरांत मल्टीस्पेशालिटी हॉस्पिटलच्या माध्यमातूनही त्यांचे आरोग्यविषयक कार्य सातत्याने सुरू आहे. दुसरीकडे, भूलतज्ज्ञ म्हणून जबाबदारी सांभाळणाऱ्या डॉ. वैशाली जाधव यांनी औद्योगिक स्वास्थ्य चिकित्सक म्हणून कामगारांच्या आरोग्यविषयक प्रश्नांवर प्रभावी काम करत कोकणातील वैद्यकीय सेवेत महत्त्वाचे योगदान दिले आहे.
वैद्यकीय क्षेत्राव्यतिरिक्त समाजकारणातही या दाम्पत्याचा सहभाग मोठा राहिला आहे. डॉ. यतीन जाधव हे लोकमान्य टिळक स्मारक वाचन मंदिर, सांजसोबत प्रतिष्ठान, आपलं चिपळूण, एकता विकास मंच, विभा अरविंद ग्रंथालय, अखिल भारतीय बालकुमार साहित्य परिषद, राज्य आपत्ती व्यवस्थापन समिती, इंडियन मेडिकल असोसिएशन (महाराष्ट्र राज्य) तसेच ‘टच’ यांसारख्या अनेक संस्थांच्या माध्यमातून सातत्याने कार्यरत आहेत. या सर्व उपक्रमांमध्ये डॉ. वैशाली जाधव यांची त्यांना मोलाची साथ लाभत आहे. आपल्या मातीतील माणसांची सेवा करण्यासाठी आयुष्य समर्पित करणाऱ्या या दाम्पत्याच्या कार्याची अधिकृत पत्राद्वारे दखल घेत वाहिनीने हा पुरस्कार जाहीर केला असून, या गौरवार्ह यशामुळे चिपळूणसह संपूर्ण कोकण परिसरातून त्यांच्यावर अभिनंदनाचा वर्षाव होत आहे.
