ठाणे: दिवाळीच्या औचित्यावर संस्कृती, परंपरा आणि कलागुणांना प्रोत्साहन देण्यासाठी ठाण्यात आयोजित करण्यात आलेल्या भव्य किल्ला व रांगोळी स्पर्धेला नागरिकांचा मोठा प्रतिसाद लाभला. स्व. बारकू वैती प्रतिष्ठान आणि श्री साईधाम आनंद संस्था, काजूवाडी वैतीनगर रहिवासी मित्र मंडळ यांच्या संयुक्त विद्यमाने तब्बल ३८ वर्षांची अखंड परंपरा जपत या स्पर्धेचे आयोजन करण्यात आले होते. धर्मवीर आनंद दिघे यांच्या आशीर्वादाने सुरू झालेल्या आणि उपमुख्यमंत्री एकनाथ शिंदे यांच्या मार्गदर्शनाखाली दरवर्षी साजऱ्या होणाऱ्या या उपक्रमात यंदाही लहान मुलांनी कल्पकतेतून गडकिल्ले साकारले, तर महिला व तरुणींनी विविध सामाजिक व कलात्मक विषयांवर आकर्षक रांगोळ्या रेखाटल्या.
या स्पर्धेचे विशेष आकर्षण म्हणजे जनसेवक तथा ठाण्याचे माजी महापौर अशोक वैती यांनी आपल्या व्यस्त दिनक्रमातून वेळ काढून साईनाथ नगर, रमाबाई नगर, लुईसवाडी, जिजामाता नगर, रामचंद्रनगर, काजूवाडी आणि वैतीनगर या भागांना प्रत्यक्ष भेटी दिल्या. त्यांनी मुलांनी साकारलेल्या किल्ल्यांची आणि महिलांच्या रांगोळी सजावटीची बारकाईने पाहणी करत चिमुकल्यांशी आस्थेने संवाद साधला व त्यांच्या पाठीवर कौतुकाची थाप दिली. एका ज्येष्ठ लोकप्रतिनिधीने थेट आपल्या दारात येऊन कलाकृतीचे कौतुक केल्याने बालचमूंमध्ये मोठा उत्साह पाहायला मिळाला.
या स्पर्धेतील विजेत्यांसाठी रोख पारितोषिके, सन्मानचिन्ह आणि प्रशस्तिपत्रे जाहीर करण्यात आली आहेत. किल्ला स्पर्धेसाठी प्रथम क्रमांकास ३,३३३ रुपये, द्वितीय क्रमांकास २,२२२ रुपये आणि तृतीय क्रमांकास १,१११ रुपये, तर रांगोळी स्पर्धेत प्रथम क्रमांकास २,२२२ रुपये, द्वितीय क्रमांकास १,१११ रुपये आणि तृतीय क्रमांकास ५५५ रुपये पारितोषिक देऊन गौरविण्यात येणार आहे. ८ ते १० नोव्हेंबरदरम्यान नागरिकांना या कलाकृती पाहण्यासाठी खुले प्रदर्शन ठेवण्यात आले होते.
या तीन दिवसीय महोत्सवाचा सांगता समारंभ काजूवाडी येथील सिद्धिविनायक चौक परिसरातील श्री साईबाबा मंदिरात भव्य दीपोत्सवाने उत्साहात पार पडला. नव्या पिढीमध्ये छत्रपती शिवाजी महाराजांचा जाज्वल्य इतिहास, गडकिल्ल्यांचे महत्त्व आणि सण-उत्सवांचे सांस्कृतिक मूल्य रुजवण्यासाठी हा ३८ वर्षांचा उपक्रम दिशादर्शक ठरत असल्याचे मत यावेळी व्यक्त करण्यात आले. स्पर्धेत मोठ्या संख्येने सहभागी होऊन सहकार्य केल्याबद्दल आयोजक अशोक बारकू वैती यांनी सर्व नागरिक, महिला आणि बालकांचे आभार मानले.
