संगमेश्वर : नवरात्रोत्सवाचे औचित्य साधून रत्नागिरी आंबेड बुद्रुक येथील ‘अंतरा फाउंडेशन’च्या वतीने संगमेश्वर तालुक्यातील शिक्षण, आरोग्य आणि समाजसेवा यांसारख्या विविध क्षेत्रांत उल्लेखनीय कार्य करणाऱ्या महिलांचा त्यांच्या निवासस्थानी जाऊन शाल, श्रीफळ आणि पुष्पगुच्छ देऊन विशेष गौरव करण्यात आला. समाजासाठी अहोरात्र राबणाऱ्या महिला शक्तीचा सन्मान करण्याच्या या स्तुत्य उपक्रमाचे सर्व स्तरांतून कौतुक होत आहे.
या सन्मान दौऱ्यादरम्यान जिल्हा परिषद केंद्र शाळा संगमेश्वर नंबर दोन येथील आदर्श शिक्षिका रेखा जाधव, रामपेठ येथील अंगणवाडी सेविका पल्लवी सचिन शेरे, मदतनीस शीतल दिनेश अंब्रे तसेच संभाजीनगर येथील मदतनीस माया जाधव यांना त्यांच्या अविरत सेवेबद्दल सन्मानित करण्यात आले. आरोग्य क्षेत्रातील योगदानाबद्दल नावडी परिसरातील आशा सेविका वृषाली विनय मुरकर, संभाजीनगर येथील सारिका विशाल पवार आणि रामपेठ येथील आशा सेविका अर्पिता विजयानंद शेट्ये यांचाही विशेष सत्कार करण्यात आला. फाउंडेशनच्या पदाधिकाऱ्यांनी थेट घरी येऊन केलेल्या या सन्मानामुळे सर्व सेविका आणि शिक्षिकांनी मनस्वी समाधान व्यक्त केले.
दौऱ्यादरम्यान संभाजीनगर येथे नवदुर्गा देवीच्या स्थापनेला पंचवीस वर्षे पूर्ण झाल्याच्या रौप्यमहोत्सवानिमित्त नवतरुण मित्र मंडळाचे अध्यक्ष गणेश पवार आणि उपाध्यक्ष आकाश कुऱ्हाडे यांनी अंतरा फाउंडेशनच्या अध्यक्षा नुपुरा उन्मेष मुळ्ये, सचिव राजेश आंबेकर, उपाध्यक्षा सरिता आंबेकर, कार्यकर्त्या सुमनताई झगडे, रोहिणी सुर्वे तसेच नावडी येथील सामाजिक कार्यकर्ते दिनेशभाई अंब्रे यांचे पुष्पगुच्छ देऊन स्वागत केले. यानंतर पदाधिकाऱ्यांनी पाग-आळी येथील निनावी देवी मंदिरात तसेच घनश्याम प्रसादे यांच्या घरगुती नवरात्रोत्सवात जाऊन दर्शन घेतले.
या दौऱ्यात निधळेवाडी येथे स्थापन केलेल्या दुर्गामातेचे दर्शन घेऊन उपस्थित महिला वर्गाशी संवाद साधण्यात आला. यावेळी अंतरा फाउंडेशनच्या अध्यक्षा नुपुरा मुळ्ये आणि सामाजिक कार्यकर्ते दिनेश अंब्रे यांनी ग्रामीण महिला दिन, वाचन प्रेरणा दिन, नवरात्रोत्सवाचे सामाजिक महत्त्व यासह ‘पाणी अडवा, पाणी जिरवा’ या संकल्पनेवर उपस्थितांना मार्गदर्शन केले. तसेच निधळेवाडी येथील उदयोन्मुख युवा गायिका गौतमी वाडकर हिचाही शाल, श्रीफळ व भेटवस्तू देऊन नवदुर्गा सन्मान करण्यात आला. महिलांच्या सन्मानासोबतच सामाजिक प्रबोधनाची जोड देणारा हा संपूर्ण उपक्रम अत्यंत उत्साहात पार पडला.
