रत्नागिरी : आंतरराष्ट्रीय मच्छीमार महिला दिनाचे औचित्य साधून मच्छीमारबहुल वरवडे येथे इनरव्हील क्लब ऑफ रत्नागिरी मिडटाऊन आणि शिरगाव येथील मत्स्य अभियांत्रिकी तंत्रनिकेतन यांच्या संयुक्त विद्यमाने मोफत सर्वसमावेशक आरोग्य तपासणी शिबिराचे यशस्वी आयोजन करण्यात आले. मच्छीमार समाजातील महिला आणि ग्रामस्थांना उत्तम आरोग्य सुविधा त्यांच्या गावातच सहज उपलब्ध व्हाव्यात या उद्देशाने राबवण्यात आलेल्या या समाजोपयोगी उपक्रमाला स्थानिक नागरिकांचा मोठ्या प्रमाणावर उत्स्फूर्त प्रतिसाद लाभला.
शिबिरादरम्यान सांबरे हॉस्पिटलच्या तज्ज्ञ डॉक्टरांच्या पथकाने ग्रामस्थांची सर्वसाधारण आरोग्य तपासणी करून आवश्यकतेनुसार रुग्णांना मोफत औषधांचे वाटप केले. तसेच नंदादीप नेत्रालयाच्या वतीने अत्याधुनिक उपकरणांद्वारे डोळ्यांची सखोल तपासणी करून गरजू रुग्णांना चष्मे उपलब्ध करून देण्यात आले, तर दंत तपासणीची धुरा इनरव्हीलच्या सचिव डॉ. प्रियांका कांबळे यांनी सांभाळली. गावातील महिला आणि शेवटच्या घटकापर्यंत या शिबिराची माहिती पोहोचवून त्यांना उपस्थित ठेवण्यासाठी चंडिकादेवी एफएफपीओ संस्थेच्या अध्यक्षा रिना सुर्वे आणि अस्विता पटेकर यांनी विशेष परिश्रम घेतले. या कार्यक्रमात इनरव्हीलच्या आयएसओ प्रज्ञा गांधी यांचीही प्रमुख उपस्थिती होती.
उद्घाटनप्रसंगी मत्स्य अभियांत्रिकी तंत्रनिकेतनचे प्राचार्य डॉ. केतन चौधरी यांनी उपस्थितांना मार्गदर्शन करताना सागरी मत्स्य व्यवसायात महिलांचे योगदान अत्यंत मोलाचे असून त्यांच्या कार्याचा यथोचित सन्मान राखणे ही काळाची गरज असल्याचे प्रतिपादन केले. केवळ आरोग्य तपासणीपुरते मर्यादित न राहता या शिबिराच्या माध्यमातून उपस्थित मच्छीमारांना व्यवसायाभिमुख मोलाचे मार्गदर्शनही करण्यात आले. यामध्ये तंत्रनिकेतनचे डॉ. सुशील कांबळे, शुभम महाडिक आणि आदित्य शेटे यांनी आकर्षक माहितीपर पोस्टर्सद्वारे सागरी मासेमारी व्यवस्थापनाचे विविध पैलू उलगडून दाखवले, तर सागरी जीवशास्त्रीय संशोधन केंद्राचे शास्त्रज्ञ डॉ. पगारकर आणि नरेंद्र चौगुले यांनी मत्स्य शीतलीकरण तसेच त्यातील आधुनिक तंत्रज्ञानाची सविस्तर माहिती दिली. दारातच मिळालेल्या दर्जेदार आरोग्य सुविधा आणि मोफत औषधोपचारामुळे वरवडेकरांनी समाधान व्यक्त करत आयोजकांप्रती कृतज्ञता व्यक्त केली.
