नागपूर : दिवाळीच्या सणासुदीत संपूर्ण कुटुंब बोधगया येथे फिरण्यासाठी गेलेले असताना, बेसा येथील रेवतीनगरमधील एका बंद घरामध्ये घडलेल्या सुन्न करणाऱ्या घटनेने उपराजधानीत प्रचंड खळबळ उडाली आहे. अवघ्या दोन महिन्यांपूर्वी ३१ ऑगस्ट रोजी आंतरजातीय प्रेमविवाह केलेल्या मनीष प्रल्हाद गणवीर आणि सोनाली मनीष गणवीर या शिक्षक दाम्पत्याचे मृतदेह एकाच पंख्याला ओढणीने गळफास घेतलेल्या अवस्थेत आढळून आले. दोघेही अगोदर घटस्फोटित होते आणि गडचिरोली जिल्ह्यातील सुरजागड येथील शाळेत शिक्षक म्हणून कार्यरत असतानाच त्यांची ओळख होऊन प्रेमात रूपांतर झाले होते.
दिवाळीच्या निमित्ताने नागपूरच्या घरी आलेल्या या जोडप्यामध्ये दुपारी कडाक्याचे भांडण झाल्याचे आणि त्यानंतर अचानक आवाज पूर्णपणे बंद झाल्याचे शेजाऱ्यांनी सांगितले; मात्र दुसऱ्या दिवशी सकाळी नातेवाईक घरी पोहोचले असता घराचा दरवाजा आतून बंद होता आणि आतमध्ये दोघांचेही मृतदेह छताला लटकताना दिसल्याने एकच आक्रोश उसळला. घटनास्थळी हॉलमध्ये दारूची एक बाटली आणि दोन रिकामे ग्लास पोलिसांना आढळून आल्याने या दुहेरी मृत्यूभोवतीचे गूढ अधिकच गडद झाले असून, बेलतरोडी पोलिसांनी तात्काळ आकस्मिक मृत्यूची नोंद करून या नवविवाहित शिक्षक दाम्पत्याने हे टोकाचे पाऊल नेमके का उचलले, या दिशेने कसून तपास सुरू केला आहे.
