नागपूर : महागड्या वस्तूंची हौस पूर्ण करण्यासाठी माणूस कोणत्या थराला जाईल, याचा प्रत्यय नागपुरातील एका धक्कादायक घटनेतून आला आहे. हातात महागडा आयफोन हवा म्हणून एका सुनेने चक्क आपल्या सासूच्याच सोन्याच्या दागिन्यांवर डल्ला मारल्याचा प्रकार उघडकीस आला आहे. सासूच्या कपाटातील मंगळसूत्र, नेकलेससह तब्बल ५३ ग्रॅम सोन्याचे दागिने चोरून त्यांची विक्री केल्याचा आरोप सुनेवर आहे. विशेष म्हणजे, या दागिन्यांच्या पैशातून तिने आयफोन खरेदी केल्याचे समोर आले आहे.
नागपुरातील शांतीनगर पोलीस ठाण्याच्या हद्दीत हा प्रकार घडला. ग्रंथाली आकाश वर्मा असे गुन्हा दाखल झालेल्या सुनेचे नाव असून, तिच्या सासू राधा वर्मा यांनी याप्रकरणी पोलिसांकडे धाव घेतली आहे. राधा वर्मा यांचा शिर्डी येथे दर्शनासाठी जाण्याचा बेत होता. त्यासाठी प्रवासाची तयारी करताना त्यांनी कपाटातील दागिने काढण्याचा प्रयत्न केला. मात्र, नेहमीच्या ठिकाणी ठेवलेले सोन्याचे दागिनेच गायब असल्याचे त्यांच्या निदर्शनास आले. घरात शोधाशोध करूनही दागिने मिळून न आल्याने त्यांनी याबाबत चौकशी सुरू केली.
गायब झालेल्या ऐवजात ३० ग्रॅम वजनाचे सोन्याचे मंगळसूत्र, १३ ग्रॅमचा नेकलेस आणि अन्य १० ग्रॅम सोन्याच्या दागिन्यांचा समावेश होता. या सर्व दागिन्यांची अंदाजे किंमत अडीच लाख रुपये असल्याचे सांगण्यात आले. घरातील दागिने अशा प्रकारे गायब झाल्याने राधा वर्मा यांना मोठा धक्का बसला.
चौकशीदरम्यान सुनेनेच दागिने घेतल्याचे उघड झाले. तिने दागिने चोरून त्यांची विक्री केल्याची कबुली दिल्याचे समजते. मात्र, चोरी केलेले दागिने अथवा त्यातून मिळालेली रक्कम परत मिळाली नसल्याने सासूने पोलिसांत तक्रार दाखल केली. महागड्या आयफोनची हौस भागवण्यासाठी घरातीलच सोन्याचा ऐवज विकल्याचा हा प्रकार नागपुरात चर्चेचा विषय ठरला आहे.
