घरामध्ये फुली ऑटोमॅटिक वॉशिंग मशिन आल्यापासून कपडे धुण्याचे कष्टाचे काम अत्यंत सोपे झाले असले तरी, अनेकदा मशिनमधून बाहेर काढलेल्या स्वच्छ कपड्यांना कुबट किंवा अजब दुर्गंधी येत असल्याची तक्रार अनेकांकडून केली जाते. कपडे व्यवस्थित स्वच्छ न झाल्यामुळे नाही, तर मशिनच्या आत जमा झालेली घाण, गरजेपेक्षा जास्त डिटर्जंटचा वापर आणि कपडे धुण्याच्या चुकीच्या सवयींमुळे ही दुर्गंधी निर्माण होते. अनेक जण कपडे अधिक स्वच्छ आणि सुवासिक होण्याच्या आशेने गरजेपेक्षा जास्त डिटर्जंट टाकतात; परंतु थंड पाण्यात किंवा कमी वेळेच्या वॉश सायकलमध्ये डिटर्जंटचे कण पूर्णपणे विरघळत नाहीत आणि कपड्यांच्या धाग्यांमध्ये अडकून राहतात, ज्यामुळे कालांतराने दुर्गंधी सुटते. हे टाळण्यासाठी मशिनच्या क्षमतेनुसारच डिटर्जंट वापरावा आणि महिन्यातून एकदा रिकाम्या ड्रममध्ये क्लीनिंग सायकल चालवून आत साचलेली घाण व डिटर्जंटचे अवशेष स्वच्छ करावेत.
कपडे धुऊन झाल्यानंतर मशिनचा दरवाजा तात्काळ बंद करण्याची सवय देखील दुर्गंधीला निमंत्रण देते, कारण ड्रम, रबर आणि डिटर्जंट ट्रेमध्ये साचलेला ओलावा बाहेर न पडल्याने आत बुरशी आणि कुबटपणा वाढतो, ज्याचा वास थेट कपड्यांना लागतो. त्यामुळे कपडे बाहेर काढल्यावर मशिनचा दरवाजा काही वेळ उघडा ठेवणे, फ्रंट लोड मशिनचे रबर कोरड्या कापडाने पुसणे आणि डिटर्जंट ट्रे वेळोवेळी साफ करणे आवश्यक ठरते. याशिवाय, अनेक जण वॉश सायकल पूर्ण झाल्यानंतरही ओले कपडे तासनतास बंद मशिनमध्येच पडून ठेवतात, ज्यामुळे हवा न मिळाल्याने कपड्यांना आंबूस किंवा कुबट वास येतो; त्यामुळे धुतलेले कपडे तात्काळ बाहेर काढून वाळत घालणे गरजेचे असते आणि जास्त वेळ पडून राहिल्यास ते पुन्हा धुवून घ्यावेत. एकाच वेळी सर्व कपडे उरकण्याच्या नादात मशिन क्षमतेपेक्षा जास्त भरल्यास कपड्यांना फिरण्यासाठी पुरेशी जागा मिळत नाही व पाणी आणि डिटर्जंट प्रत्येक भागापर्यंत पोहोचत नसल्याने घाण तशीच राहते, म्हणून ड्रममध्ये थोडी मोकळी जागा ठेवूनच कपडे टाकावेत आणि गरज भासल्यास एक्स्ट्रा रिन्स सायकलचा वापर करावा. सरतेशेवटी, विशेषतः दमट किंवा पावसाळ्याच्या दिवसांत कपडे पूर्णपणे न सुकताच घडी करून कपाटात ठेवल्यास त्यांना कुबट वास येतो, त्यामुळे घरात कपडे वाळवताना हवा खेळती राहील याची काळजी घ्यावी, पंखा चालू ठेवावा, ड्रायरचा लिंट फिल्टर नियमित साफ करावा आणि कपडे पूर्णपणे कोरडे झाल्यानंतरच कपाटात ठेवावेत.
