चार महिन्याच्या चिमुकलीला उघड्यावर सोडून स्वप्नील गेला; बापाच्या मायेसाठी लेकीची नजर भिरभिरतेय…

संगमेश्वर सायले येथे गणपती डेकोरेशन दरम्यान स्वप्निल कानालाचा मृत्यू, 4 महिन्यापूर्वीच आईचा मृत्यू

देवरुख : वर्षभराच्या प्रतीक्षेनंतर आलेला गणेशोत्सव… घराघरांत आनंदाचे वातावरण… बाप्पाच्या आगमनाची लगबग सुरू असतानाच संगमेश्वर तालुक्यातील सायले गावावर काळाने असा घाला घातला. एका हसत्या-खेळत्या कुटुंबाचा आधारच हिरावला. गणपतीच्या डेकोरेशनची आणि साफसफाईची कामे करत असताना विजेचा जबर धक्का बसून स्वप्निल श्रीकांत कानाल (२५) या तरुणाचा दुर्दैवी मृत्यू झाला. अवघ्या चार महिन्यांची चिमुकली मुलगी आणि दुसरी चार वर्षांची मुलगी मागे ठेवून स्वप्निल निघून गेल्याने संपूर्ण गाव सुन्न झाले आहे.

केवळ चार महिन्याच्या चिमुकलीच्या डोक्यावरच वडिलांच्या मायेचं छप्पर हरपलेय, बापाच्या मायेसाठी अजून शब्दही न उमटवू शकणाऱ्या या चिमुकलीकडे पाहताना गावकऱ्यांचे डोळे पाणावले आहेत.  गणेशोत्सवाच्या आनंदावर दुःखाची काळी छाया पसरली.

विशेष म्हणजे, अवघ्या चार महिन्यांपूर्वीच स्वप्निल यांच्या आईचे निधन झाले होते. आईच्या निधनाचे दुःख ताजे असतानाच आता तरुण मुलाचा मृत्यू झाल्याने कानाल कुटुंबावर दुःखाचा डोंगर कोसळला आहे. लागोपाठ आलेल्या या दोन आघातांनी कुटुंब अक्षरशः हादरून गेले आहे.

स्वप्निल रोजगाराच्या निमित्ताने मुंबई येथे वास्तव्यास होता. महाराष्ट्राच्या लाडक्या गणेशोत्सवाचा आनंद आपल्या कुटुंबासोबत आणि गावातील मित्रांसोबत साजरा करण्यासाठी तो अत्यंत उत्साहाने शनिवारीच आपल्या मूळ गावी सायले येथे आला होता. मात्र, गावात येऊन अवघे काही तास उलटत नाहीत तोच नियतीने त्याच्यावर आणि त्याच्या कुटुंबावर घाला घातला.

रविवारी सकाळी घरात बाप्पाच्या आगमनाची तयारी सुरू होती. मखर सजवणे, विद्युत रोषणाईची व्यवस्था करणे आणि घराची साफसफाई करण्याची लगबग सुरू होती. याच कामात स्वप्निलही सहभागी झाला होता. घराची साफसफाई करत असताना अनावधानाने त्याला विजेचा जबर धक्का बसला. विजेचा झटका इतका तीव्र होता की, स्वप्निल जागीच जमिनीवर कोसळला आणि गंभीर अवस्थेत बेशुद्ध झाला.

हा प्रकार लक्षात येताच घरातील सदस्य आणि शेजाऱ्यांनी तातडीने धावपळ सुरू केली. स्वप्निलला उपचारासाठी जवळच्या रुग्णालयात नेण्यात आले. मात्र, विजेचा धक्का इतका प्राणघातक ठरला की, वैद्यकीय अधिकाऱ्यांनी तपासणीनंतर त्याला दाखल करण्यापूर्वीच मृत घोषित केले.

स्वप्निलच्या मृत्यूची बातमी गावात पसरताच प्रत्येक घरात हळहळ व्यक्त झाली. काही वेळापूर्वी बाप्पाच्या स्वागतासाठी सजलेले घर क्षणार्धात शोकाकुल झाले. चार महिन्यांच्या चिमुकलीला वडिलांचा चेहरा पुन्हा कधीच दिसणार नाही, तर चार वर्षांच्या मुलीच्या डोक्यावरचा पित्याचा हात कायमचा निघून गेला आहे. या विचारानेच सायले गावातील प्रत्येकाचे मन हेलावून गेले आहे. आनंदासाठी आलेला गणेशोत्सव एका कुटुंबासाठी मात्र आयुष्यभराची वेदना देऊन गेला.