सावर्डेत प्रथमच ‘कार्डिओ-डायबेटिक क्लिनिक’चा शुभारंभ

हृदयरोग, मधुमेह व उच्च रक्तदाबासाठी तज्ज्ञ वैद्यकीय सेवा उपलब्ध

सावर्डे : चिपळूण तालुक्यातील सावर्डे येथील सुपुत्री डॉ. मृणाल पौरस जाधव (एमबीबीएस, डीएनबी मेडिसिन) यांच्या ‘मृणाल कार्डिओ डायबेटिक क्लिनिक’चा शुभारंभ उत्साहात करण्यात आला. सावर्डे परिसरात प्रथमच हृदयरोग, मधुमेह, उच्च रक्तदाब, तसेच संबंधित आजारांसाठी तज्ज्ञ वैद्यकीय सेवा उपलब्ध झाल्याने परिसरातील नागरिकांना मोठी सुविधा मिळणार आहे.

डेरवण फाटा, चिपळूण येथे हे क्लिनिक सुरू करण्यात आले आहे. हृदयरोग, मधुमेह आणि उच्च रक्तदाब यांसारख्या आजारांचे निदान, वैद्यकीय तपासणी तसेच तज्ज्ञ डॉक्टरांचा सल्ला या माध्यमातून नागरिकांना उपलब्ध होणार आहे. त्यामुळे या आजारांसाठी चिपळूण शहरासह दूरच्या ठिकाणी जाण्याची गरज परिसरातील नागरिकांना काही प्रमाणात कमी होणार आहे.

क्लिनिकच्या शुभारंभप्रसंगी ॲड. विश्वजित यादव, मुद्रा हॉटेलचे सुनीलशेठ जाधव, एसटी वाहतूक निरीक्षक सानिका हातखंबकर, गायत्री यादव, ऊर्मिला यादव, अश्विनी जाधव यांच्यासह विविध क्षेत्रांतील मान्यवर उपस्थित होते. उपस्थित मान्यवरांनी डॉ. मृणाल जाधव यांचे अभिनंदन करून त्यांना पुढील वाटचालीसाठी शुभेच्छा दिल्या.

सावर्डे व परिसरातील नागरिकांसाठी स्थानिक पातळीवर तज्ज्ञ वैद्यकीय सेवा उपलब्ध करून देण्याच्या उद्देशाने हे क्लिनिक सुरू करण्यात आले आहे. नागरिकांनी या वैद्यकीय सेवेचा लाभ घ्यावा, असे आवाहन करण्यात आले.