चिपळूण (प्रतिनिधी): तालुक्यातील खेर्डी येथून कामावर जाण्यासाठी घरातून पडलेली चाळीस वर्षीय महिला गूढरीत्या बेपत्ता झाल्याची घटना घडली आहे. या महिलेला गुप्तपणे डांबून ठेवण्याच्या उद्देशाने अज्ञात इसमाने तिचे अपहरण केल्याचा संशय व्यक्त करण्यात आला असून, या प्रकरणी चिपळूण पोलीस ठाण्यात गुन्हा नोंदवण्यात आला आहे.
रूपाली मारुती जाधव (वय ४० वर्षे, सध्या रा. दत्तछाया निवास, रूम नं. ७, कलावती आई मंदिरासमोर, खेर्डी, ता. चिपळूण) असे अपहरण झालेल्या महिलेचे नाव आहे. याप्रकरणी सामाजिक कार्यकर्ते अनंत विठ्ठल रहाटे (वय ४५ वर्षे, रा. दत्तछाया निवास, खेर्डी) यांनी पोलिसांत फिर्याद दिली आहे. फिर्यादी आणि रूपाली जाधव हे दोघे गेल्या सुमारे आठ महिन्यांपासून खेर्डी येथील फ्लॅटवर एकत्र राहत होते. मंगळवार, ६ ऑक्टोबर रोजी सकाळी साडेनऊ वाजण्याच्या सुमारास रूपाली या ‘शिवराज ढाबा’ येथे नेहमीप्रमाणे कामावर जाण्यासाठी घरातून निघाल्या. मात्र, कामाची वेळ संपल्यानंतरही त्या संध्याकाळपर्यंत घरी परतल्या नाहीत.
त्यांच्याशी संपर्क होऊ न शकल्याने आणि सर्वत्र शोध घेऊनही कोणतीही माहिती न मिळाल्याने, कोणीतरी अज्ञात इसमाने त्यांना गुप्तपणे व गैरमार्गाने डांबून ठेवण्याच्या हेतूने पळवून नेल्याची फिर्यादीची खात्री पटली. अनंत रहाटे यांच्या तक्रारीवरून चिपळूण पोलिसांनी अज्ञात इसमाविरुद्ध भारतीय न्याय संहिता २०२३ च्या कलम १४०(३) अन्वये गुन्हा दाखल केला असून, पोलीस पथक महिलेचा व संशयित आरोपीचा कसून शोध घेत आहे.
