सावर्डे : आजच्या बदलत्या आर्थिक परिस्थितीत शासकीय व खासगी क्षेत्रातील नोकऱ्यांच्या संधी मर्यादित होत असताना तरुणांनी केवळ नोकरीवर अवलंबून न राहता स्वतःचे स्टार्टअप व उद्योगधंदे उभारून स्वावलंबी व्हावे, या उद्देशाने सह्याद्री पॉलिटेक्निकच्या प्रांगणात विशेष मार्गदर्शन मेळावा पार पडला. मराठा सेवा संघ (रत्नागिरी जिल्हा) आणि सावर्डे येथील सह्याद्री पॉलिटेक्निक यांच्या संयुक्त विद्यमाने ‘युवा उद्योजकता आणि शासकीय कर्ज योजना मार्गदर्शन मेळावा’ अत्यंत उत्साही वातावरणात संपन्न झाला. छत्रपती शिवाजी महाराजांनी स्वराज्य समृद्ध करण्यासाठी आरमार, जहाजबांधणी, व्यापार आणि शेतीला मोठी चालना दिली होती, तोच आदर्श डोळ्यांसमोर ठेवून कोकणातील सुशिक्षित तरुणांनी उद्योजकतेकडे वळावे, असे प्रतिपादन प्राचार्य भोसले यांनी उद्घाटनप्रसंगी केले.
या मेळाव्यात जिल्हा उद्योग केंद्र आणि विविध शासकीय महामंडळांच्या वतीने विद्यार्थ्यांना उपलब्ध कर्ज योजनांचे सविस्तर मार्गदर्शन करण्यात आले. सहाय्यक उद्योग अधिकारी अर्चना सकपाळ यांनी मुख्यमंत्री रोजगार निर्मिती कार्यक्रमांतर्गत (सीएमईजीपी) ग्रामीण भागात ३५ टक्के आणि शहरी भागात २५ टक्के अनुदान उपलब्ध असल्याचे नमूद करत सेवा क्षेत्रासाठी ५० लाखांपर्यंत तर उत्पादन क्षेत्रासाठी एक कोटी रुपयांपर्यंत कर्जमर्यादा दिली जात असल्याची माहिती दिली. यासोबतच पीएमईजीपी, २५ लाखांपर्यंतची बीज भांडवल योजना आणि दहापेक्षा अधिक उद्योजकांनी एकत्र येऊन सुरू करावयाच्या क्लस्टर विकास योजनेचे फायदे समजावून सांगण्यात आले.
कार्यक्रमात मराठा सेवा संघाचे प्रदेश कार्याध्यक्ष डॉ. नवनाथ घाडगे पाटील यांनी मार्गदर्शन करताना, दिल्ली-मुंबई इंडस्ट्रियल कॉरिडॉरसारख्या (डीएमआयसी) मोठ्या प्रकल्पांमुळे माणगावसह लगतच्या कोकण पट्ट्यात प्रचंड औद्योगिक संधी निर्माण होत असून मुबलक साधनसंपत्तीच्या बळावर तरुणांनी उद्योजक बनून परिवर्तनाचे शिलेदार व्हावे, असा सल्ला दिला. तर प्रदेश उपाध्यक्ष इंजिनिअर संजय देसाई यांनी स्थानिक फणस, आंबा यांसारख्या शेतीमालावर प्रक्रिया उद्योग उभारून आणि नाविन्यपूर्ण ब्रँडिंगच्या जोरावर स्थानिक उत्पादने थेट जागतिक बाजारपेठेत पोहोचवण्याचे आवाहन केले. या मार्गदर्शन शिबिरास संस्थेतील विविध विभागांचे विभागप्रमुख, प्राध्यापक वर्ग, जिल्ह्यातील नवउद्योजक व्यावसायिक आणि शेकडो विद्यार्थी मोठ्या संख्येने उपस्थित होते, तर शेवटी प्राचार्य भोसले यांनी उपस्थितांचे आभार मानले.
