संगमेश्वर : संगमेश्वर नावडी परिसरातील गणपती मंदिराच्या नजीक राहणाऱ्या ज्येष्ठ नागरिक श्रीमती सरिता सुरेश कुचेकर (वय ८७) यांचे आज, शुक्रवारी दुपारी दोन वाजण्याच्या सुमारास वृद्धापकाळाने निधन झाले. त्यांच्या निधनाचे वृत्त समजताच नावडीसह संगमेश्वर परिसरावर शोककळा पसरली असून विविध स्तरांतून हळहळ व्यक्त केली जात आहे.
श्रीमती सरिता कुचेकर या त्यांच्या अत्यंत शांत, प्रेमळ आणि कुटुंबवत्सल स्वभावासाठी परिचित होत्या. दीर्घायुष्याच्या प्रवासात त्यांनी नेहमीच घरात उत्तम संस्कार, स्नेह आणि एकोपा टिकवून ठेवला. कुटुंबातील प्रत्येकाशी जिव्हाळ्याचे नाते जपत त्यांनी आपले संपूर्ण आयुष्य समाधानाने व्यतीत केले. त्यांच्या निधनाने संपूर्ण कुचेकर कुटुंबाचा एक मोठा आधारवड आणि मार्गदर्शक हरपल्याची भावना व्यक्त होत आहे. त्यांच्या पश्चात तीन मुले, सुना, नातवंडे असा मोठा आणि सुविद्य परिवार आहे.
दरम्यान, श्रीमती सरिता कुचेकर यांच्या पार्थिवावर आज, शुक्रवार दिनांक २५ सप्टेंबर रोजी रात्री आठ वाजता अंत्यसंस्कार करण्यात येणार आहेत. त्यांची अंत्ययात्रा नावडी गणपती मंदिराजवळील त्यांच्या राहत्या घरापासून निघणार असून नातेवाईक, आप्तेष्ट, मित्रपरिवार आणि परिसरातील नागरिकांनी उपस्थित राहावे, असे आवाहन कुचेकर परिवाराकडून करण्यात आले आहे.
