रत्नागिरी : शहरातील पादचाऱ्यांच्या हक्काच्या फुटपाथवर अतिक्रमण करणाऱ्या अनधिकृत टपऱ्यांविरोधात नगरपालिकेने उगारलेला कारवाईचा बडगा गणेशोत्सवानंतर अचानक थंडावल्याचे चित्र दिसत आहे. सणाचे कारण पुढे करून तात्पुरती स्थगित केलेली ही मोहीम उत्सव संपल्यानंतरही पूर्ववत न झाल्याने, ही धडक मोहीम नेमकी थांबली की बासनात गुंडाळली गेली, असा संतप्त सवाल आता रत्नागिरीकरांमधून उपस्थित केला जात आहे.
स्मार्ट सिटी संकल्पनेच्या धर्तीवर रत्नागिरी शहरात सध्या मुख्य रस्त्यांचे रुंदीकरण, डांबरीकरण आणि सुशोभीकरणाची कामे वेगाने सुरू आहेत. नागरिकांना विनाअडथळा चालता यावे यासाठी रस्त्यांच्या दुतर्फा प्रशस्त पेव्हर ब्लॉकयुक्त फुटपाथ तयार करण्यात आले आहेत. मात्र, सुशोभीकरणाचे काम पूर्ण होताच याच पदपथांवर अनधिकृत टपऱ्या, हातगाड्या आणि खोक्यांचे पेव फुटले. लाखो रुपयांचा निधी खर्चून उभारलेले हे फुटपाथ पादचाऱ्यांसाठी आहेत की अनधिकृत व्यावसायिकांच्या पथारीसाठी, असा तीव्र असंतोष सामान्य नागरिकांमध्ये धुमसत होता.
वाढत्या तक्रारींची गंभीर दखल घेत नगराध्यक्षा शिल्पा सुर्वे यांनी धाडसी भूमिका घेत सर्व अनधिकृत टपऱ्या तात्काळ हटवण्याचे स्पष्ट आदेश प्रशासनाला दिले होते. पालिकेच्या सर्वसाधारण सभेतही या निर्णयाला सर्वपक्षीय नगरसेवकांनी एकमुखाने पाठिंबा दर्शवला होता. या निर्णयानंतर पालिका प्रशासनाने गणेशोत्सवापूर्वी तातडीने कारवाईचा बडगा उगारत छत्रपती शिवाजीनगर परिसरातील पदपथांवरील सर्व बेकायदा टपऱ्या जमीनदोस्त केल्या होत्या. प्रशासनाच्या या धडक पावलामुळे शहरवासीयांकडून समाधान व्यक्त झाले होते.
मात्र, शिवाजीनगर भागातील कारवाई आटोपल्यानंतर जुना माळनाका आणि त्यापुढील सखल भागातील मोहीम गणेशोत्सवाचे कारण सांगून अचानक स्थगित करण्यात आली. उत्सव संपताच शहराच्या उर्वरित सर्व भागांतील अनधिकृत बांधकामे हटवून रस्ते आणि फुटपाथ पूर्णपणे मोकळे केले जातील, असे आश्वासन त्यावेळी प्रशासनाकडून देण्यात आले होते. आता गणेशोत्सव शांततेत पार पडून अनेक दिवस उलटले तरी पालिकेचे अतिक्रमण विरोधी पथक रस्त्यावर उतरलेले नाही.
शहरातील बाजारपेठ, जुना माळनाका आणि मुख्य रस्त्यांवरील पदपथ आजही अनधिकृत टपऱ्यांच्या विळख्यात अडकलेले आहेत. त्यामुळे प्रशासनाची ही मोहीम सणापुरतीच मर्यादित होती की पडद्यामागून आलेल्या राजकीय दबावामुळे उर्वरित कारवाई थंड बस्त्यात टाकण्यात आली, अशी उघड चर्चा नागरिकांमध्ये सुरू आहे. आता नगरपालिका प्रशासन या दबावाला झुगारून उर्वरित फुटपाथ मोकळे करणार की सर्वसामान्यांना पुन्हा रस्त्यावरूनच धोकादायक प्रवास करावा लागणार, याकडे संपूर्ण शहराचे लक्ष लागले आहे.
