मुंबई : केंद्रीय मुख्य निवडणूक आयुक्त ज्ञानेश कुमार यांची संशयास्पद कार्यपद्धती आणि वादग्रस्त एसआयआर प्रक्रियेविरोधात मनसे अध्यक्ष राज ठाकरे आणि उद्धवसेनेचे पक्षप्रमुख उद्धव ठाकरे ४ ऑक्टोबर रोजी मुंबईत संयुक्त महाजनमोर्चा काढणार असतानाच, तत्पूर्वी २ ऑक्टोबर रोजी कॉकरोच जनता पार्टीने (सीजेपी) पुकारलेल्या आंदोलनाला मुंबई पोलिसांनी परवानगी नाकारली आहे. मुख्य निवडणूक आयुक्त ज्ञानेश कुमार यांनी तात्काळ राजीनामा दिला नाही, तर महात्मा गांधी जयंतीच्या मुहूर्तावर मुंबईतून देशव्यापी आंदोलन छेडण्याचा थेट इशारा सीजेपी संस्थापक अभिजीत दीपके यांनी दिला होता. याच पार्श्वभूमीवर पक्षाचे राष्ट्रीय संघटन प्रमुख अजिंक्य शिंदे यांनी ऐतिहासिक शिवाजी पार्क मैदानावर आंदोलनासाठी पोलिसांकडे रीतसर परवानगी मागितली होती; मात्र पोलिसांनी ती फेटाळल्याने राजकीय वातावरण तापले आहे.
उच्च न्यायालयाचा जनहित याचिका (PIL) क्रमांक ११६/२००९ मधील दिनांक ०४/०१/२०१३ चा निर्णय आणि महाराष्ट्र शासनाने २०/०१/२०१६ रोजी काढलेल्या आदेशानुसार शिवाजी पार्क येथे कोणत्याही प्रकारच्या जमावासाठी अथवा कार्यक्रमासाठी परवानगी देण्याचे कायदेशीर अधिकार पोलिसांना नाहीत; त्यामुळेच हा अर्ज नाकारण्यात आल्याचे मुंबई पोलिसांनी स्पष्ट केले आहे. अर्जदार अजिंक्य शिंदे यांना वस्तुस्थितीची कल्पना देण्यात आली असून मुंबई शहरातील इतर पर्यायी जागांचा शोध घेऊन नव्याने अर्ज करण्याचा सल्ला देण्यात आला आहे; अशा अर्जाचा नियमानुसार योग्य तो विचार केला जाईल, असेही पोलिसांनी स्पष्ट केले आहे.
दरम्यान, प्रशासकीय पातळीवर परवानगी नाकारल्यानंतर अभिजीत दीपके यांनी आक्रमक पवित्रा घेत मुंबईत ‘जेल भरो आंदोलन’ सुरू करण्याचा इशारा सोशल मीडियावर पोस्ट करून दिला आहे. नागरिकांचा सनदशीर आवाज दाबण्यासाठी वापरले जाणारे असे प्रकार पूर्णपणे अस्वीकार्य आहेत, असा आरोप करत लोकशाही मार्गाने आंदोलन करण्याचा मूलभूत अधिकार नाकारला गेल्यास २ ऑक्टोबर रोजी गांधी जयंतीच्या दिवशी सीजेपी मुंबईभर तीव्र जेल भरो आंदोलन छेडेल, असा थेट इशारा दीपके यांनी दिला आहे.
