देवरुख : देवरुख-संगमेश्वर-साखरपा
रस्त्याची २०२२ पासून पाच वर्षांची देखभाल आणि दुरुस्तीची हमी असतानाही, दरवर्षी पावसाळ्यात या रस्त्याची दयनीय अवस्था होत आहे. विशेष म्हणजे, यंदा पाऊस थांबल्यानंतरही काही मोजके खड्डे सिमेंट काँक्रीटने भरले जात असून, आजूबाजूचे इतर खड्डे मात्र जैसे थे ठेवण्यात आले आहेत. याबाबत गाव विकास समितीचे अध्यक्ष उदय गोताड व संघटन प्रमुख सुहास खंडागळे यांनी सार्वजिक बांधकाम विभागाच्या कारभारावर प्रश्न उपस्थित केले आहेत.
मुळात पावसाळा नसताना हे खड्डे शास्त्रीय पद्धतीने डांबराने भरणे गरजेचे असताना चुकीच्या पद्धतीने काम सुरू असल्याने आश्चर्य व्यक्त होत आहे. जर रस्त्याला पाच वर्षांची हमी मिळालेली आहे, तर मग या हमीचा नेमका उद्देश काय? असा संतप्त सवाल गाव विकास समितीकडून उपस्थित केला जात आहे.
या रस्त्याच्या निकृष्ट कामाबाबत आणि प्रशासनाच्या दुर्लक्षाबद्दल ग्रामस्थांमध्ये तीव्र संताप उसळला आहे. सार्वजनिक बांधकाम विभागाच्या कारभारावर ताशेरे ओढत, विभागाचा कारभार ढासळल्याचा आरोप गाव विकास समितीचे संघटन प्रमुख सुहास खंडागळे यांनी केला आहे. तसेच, गाव विकास समितीचे अध्यक्ष उदय गोताड यांनीही रस्त्याच्या कामाबद्दल तीव्र नाराजी व्यक्त केली आहे. याशिवाय, जिल्हाध्यक्ष शामकर्ण भोपळकर हे सातत्याने या गंभीर प्रश्नावर आवाज उठवत असून, रस्त्याच्या या दुर्दशेला नेमके जबाबदार कोण? असा थेट सवाल त्यांनी प्रशासनाला केला आहे.
