राजापूर: तालुक्यातील काजिर्डा येथे प्रस्तावित असलेल्या महत्त्वपूर्ण जामदा प्रकल्पाच्या भूसंपादनाची प्रक्रिया आता प्रशासकीय पातळीवर अत्यंत वेगाने पुढे सरकू लागली आहे. प्रकल्पाच्या बुडीत क्षेत्रातील एकूण २०२ हेक्टरपैकी आतापर्यंत ७५ हेक्टर जमिनीची संयुक्त मोजणी पूर्ण झाली असून, यामध्ये २४० सातबारा उताऱ्यांवरील सुमारे २१०० खातेदार शेतकऱ्यांचा समावेश आहे. भूमि अभिलेख, जलसंपदा, वन, कृषी, ग्रामीण पाणीपुरवठा आणि सार्वजनिक बांधकाम या सर्व संबंधित विभागांच्या संयुक्त पथकाने पावसाळ्यापूर्वी ही मोजणी यशस्वीपणे पूर्ण केली आहे.
या मोजणीचा सविस्तर अहवाल आता भू-संपादन विभागाकडे सादर केला जाणार असून, त्यानंतर भू-संपादनाची प्रशासकीय प्रक्रिया पूर्ण करून पुढील अंतिम कार्यवाहीसाठी चिपळूण येथील लघुपाटबंधारे विभागाकडे पाठवला जाईल. तेथून शासनाचे अधिकृत नियम व निकषांनुसार बाधित शेतकऱ्यांना थेट मोबदल्याचे वाटप करण्यात येणार आहे. विशेष म्हणजे मोजणी पूर्ण झालेल्या या क्षेत्रातील सर्व संबंधित शेतकऱ्यांची संमतीपत्रे प्रशासनाला प्राप्त झाली असून, उर्वरित बुडीत क्षेत्रातील जमिनीची मोजणीही लवकरच हाती घेतली जाणार आहे.
प्रकल्पग्रस्तांच्या पुनर्वसनाच्या दृष्टीने जलसंपदा विभागामार्फत मौजे मूर येथील ‘मूर पुनर्वसन सांडवा’ प्रस्तावांतर्गत सुमारे ३३ हेक्टर आणि मौजे काजिर्डा येथील ‘ब्राह्मणखोरे पुनर्वसन गावठाण’ प्रस्तावांतर्गत सुमारे २६ हेक्टर क्षेत्र अधिग्रहीत करण्यात येत आहे. यातील काही बाधितांना मोबदल्याचे प्रत्यक्ष वाटप झाले असून काहींची प्रक्रिया सध्या प्रगतिपथावर आहे. शिवाय, बुडीत क्षेत्रातील प्रकल्पग्रस्तांना शासकीय नियमावलीनुसार देय असलेल्या सोयी-सुविधांमध्ये स्वतंत्र भूखंडही दिले जाणार आहेत.
यापूर्वी जमिनीची मोजणी पूर्ण झालेल्या काही शेतकऱ्यांना शासनाकडून नुकसानभरपाईची रक्कम थेट मिळाल्याने आणि भूसंपादनाचे काम पारदर्शकपणे सुरू असल्याने स्थानिकांमधील पूर्वीचा विरोध आता पूर्णपणे मावळला आहे. गेल्या काही वर्षांपासून विविध कारणांमुळे रखडलेल्या या जामदा प्रकल्पाला स्थानिक शेतकऱ्यांच्या सकारात्मक प्रतिसादामुळे नवी दिशा मिळाली असून, संपूर्ण परिसरातून समाधान व्यक्त केले जात आहे.
