परवाना व एनओसीविना सुरू असलेल्या कोचिंग क्लासेसवर नगरपरिषदेचा हातोडा
आळंदी: दिवेआगर समुद्रकिनाऱ्यावर सहलीदरम्यान आठ विद्यार्थ्यांचा बुडून झालेल्या हृदयद्रावक व दुर्दैवी मृत्यूनंतर खडबडून जागे झालेल्या आळंदी नगरपरिषद प्रशासनाने अत्यंत धडक पाऊल उचलले आहे. या भीषण दुर्घटनेत निष्पाप विद्यार्थ्यांचा बळी गेल्यानंतर स्थानिक प्रशासनाने थेट ॲक्शन मोडमध्ये येत विद्यार्थ्यांशी संबंधित आळंदीतील ‘विनर्स अकॅडमी’ या कोचिंग क्लासला कडक पोलीस बंदोबस्तात सील ठोकले आहे. तपासणीदरम्यान या क्लासेसकडे कोणताही अधिकृत व्यवसाय परवाना तसेच ना-हरकत प्रमाणपत्र (एनओसी) नसल्याचे धक्कादायक वास्तव समोर आले आहे.
नगरपरिषदेच्या अधिकृत नोंदीनुसार, नारायण हरिभाऊ दस यांच्या मालकीच्या मालमत्ता क्रमांक जुना ११३७ (नवीन LAN00001729) या इमारतीमध्ये ‘विनर्स अकॅडमी’ या नावाने हा खाजगी कोचिंग क्लास कोणत्याही कायदेशीर परवानगीशिवाय बेधडकपणे चालवला जात होता. नगरपरिषदेच्या अभिलेखांची पडताळणी केली असता, संस्थेने आवश्यक परवानग्या न घेताच कारभार सुरू ठेवल्याचे स्पष्ट झाले. या गंभीर बाबीची तात्काळ दखल घेत आळंदी नगरपरिषदेचे मुख्याधिकारी माधव खांडेकर यांनी कडक कारवाईचे आदेश दिले. त्यानुसार कर विभाग प्रमुख सीमा चारवे यांच्या नेतृत्वाखालील विशेष पथकाने पोलीस संरक्षणात प्रत्यक्ष घटनास्थळी पोहोचून अकॅडमीच्या इमारतीला टाळे ठोकत ती पूर्णपणे सील केली.
दिवेआगर समुद्रकिनारी घडलेल्या या काळजाचा थरकाप उडवणाऱ्या दुर्घटनेमुळे संपूर्ण आळंदी शहरावर तीव्र शोककळा पसरली असून, अनधिकृत शैक्षणिक संस्थांच्या मनमानी कारभाराचा मुद्दा ऐरणीवर आला आहे. या घटनेच्या पार्श्वभूमीवर नगरपरिषदेने शहरातील इतरही सर्व कोचिंग क्लासेस आणि व्यावसायिक आस्थापनांची सखोल तपासणी मोहीम हाती घेतली आहे. शहरातील सर्व शैक्षणिक संस्थांनी नियमानुसार आवश्यक व्यवसाय परवाने, एनओसी व इतर कायदेशीर कागदपत्रांची पूर्तता करूनच कामकाज चालवावे; नियमांचे उल्लंघन करणाऱ्यांवर कठोर कायदेशीर कारवाई केली जाईल, असा सज्जड इशारा नगरपरिषद प्रशासनाने दिला आहे.
