हैदराबाद : अमेरिकेच्या मिसुरी राज्यातील सेंट लुईस परिसरात शनिवारी रात्री उशिरा झालेल्या भीषण रस्ते अपघातात एका ३१ वर्षीय भारतीय महिलेचा मृत्यू झाला. भरधाव ट्रकने त्यांच्या कारला धडक दिल्याने हा अपघात झाला.मृत महिलेची ओळख दाराम सुप्रिया अशी झाली असून त्या तेलंगणातील महबूबाबाद जिल्ह्यातील मरीपेडा येथील रहिवासी होत्या.
कुटुंबीयांच्या माहितीनुसार, सुप्रिया त्यांचे रेस्टॉरंट बंद करून घरी परतत असताना हा अपघात झाला.या अपघातात सुप्रिया यांचा जागीच मृत्यू झाला, तर त्यांच्यासोबत कारमध्ये असलेली त्यांची मैत्रीण गंभीर जखमी झाली. ही मैत्रीण तेलंगणातील सूर्यापेट जिल्ह्यातील कोडाड येथील रहिवासी आहे. तिला तातडीने जवळच्या रुग्णालयात दाखल करण्यात आले असून तिच्यावर उपचार सुरू आहेत.
या दुर्घटनेनंतर सुप्रिया यांच्या कुटुंबावर दुःखाचा डोंगर कोसळला आहे. खम्मममधील नायडू पेटा सर्कलजवळ राहणारे सुप्रिया यांचे वडील डी. श्रीनिवास यांनी तेलंगणाचे मुख्यमंत्री ए. रेवंत रेड्डी यांना पत्र लिहून मुलीचा पार्थिव देह अंत्यसंस्कारासाठी भारतात आणण्यासाठी सरकारने मदत करावी, अशी विनंती केली आहे. त्यांच्या माहितीनुसार, हा अपघात रात्री सुमारे १ वाजून ४० मिनिटांनी झाला.
सुप्रिया यांच्या नातेवाईकांनी आणि परिचितांनी सोशल मीडियाच्या माध्यमातूनही पोलिस आणि लोकप्रतिनिधींशी संपर्क साधला आहे. खम्ममचे पोलीस आयुक्त आणि स्थानिक नेत्यांना टॅग करत कुटुंबीयांनी सुप्रिया यांचा पार्थिव देह लवकरात लवकर भारतात आणण्यासाठी तसेच आवश्यक प्रक्रिया पूर्ण करण्यासाठी सहकार्य करण्याचे आवाहन केले आहे. दरम्यान, सुप्रिया या त्यांचे पती कोडुमुरी रंजीत यांच्यासोबत मिसुरीतील वेंट्झव्हिल येथे राहत होत्या. सुप्रिया तेथे रेस्टॉरंट चालवत होत्या, तर त्यांचे पती रंजीत सॉफ्टवेअर क्षेत्रात काम करतात. या दाम्पत्याचा विवाह सुमारे पाच वर्षांपूर्वी झाला होता. त्यांना अडीच वर्षांचा मुलगाही आहे. सुप्रिया यांच्या मृत्यूची माहिती रंजीत यांनी तेलंगणातील दोन्ही कुटुंबांना दिली
