दिल्ली: भारतीय महिला क्रिकेट संघातील सलामीची फलंदाज सब्बिनेनी मेघनाने शुक्रवारी क्रिकेटच्या सर्व प्रकारांतून निवृत्ती जाहीर केली. आंध्र प्रदेशात जन्मलेली मेघना देशांतर्गत क्रिकेटमध्ये रेल्वे संघाचे प्रतिनिधित्व करत होती.
तिने २०२२ मध्ये न्यूझीलंडविरुद्धच्या एकदिवसीय मालिकेतून आंतरराष्ट्रीय क्रिकेटमध्ये पदार्पण केले होते. तिने भारताकडून तीन एकदिवसीय आणि १७ टी-२० आंतरराष्ट्रीय सामने खेळले.
२०२२ च्या राष्ट्रकुल क्रीडा स्पर्धेत रौप्यपदक जिंकणाऱ्या भारतीय महिला क्रिकेट संघाचाही मेघना भाग होती. मात्र, त्यानंतर भारतीय टी-२० संघात तिला आपले स्थान पक्के करता आले नाही. तसेच, आंतरराष्ट्रीय क्रिकेट परिषदेच्या (आयसीसी) त्यानंतरच्या स्पर्धांमध्येही तिला खेळण्याची संधी मिळाली नाही.
मेघनाने सोशल मीडियावर लिहिले, “पहिल्यांदा हातात बॅट घेऊन मैदानात उतरणे आणि जागतिक स्तरावर देशाची जर्सी परिधान करणे, हे माझ्यासाठी स्वप्न सत्यात उतरल्यासारखे होते. एक खेळाडू म्हणून क्रिकेटच्या सर्व प्रकारांतून निवृत्ती जाहीर करताना माझे मन कृतज्ञतेने भरून आले आहे. मैदान हे माझे दुसरे घर राहिले आहे. या खेळाने मला संयम आणि नम्रता शिकवली, तसेच अशा आठवणी आणि मैत्री दिली, ज्या मी आयुष्यभर जपून ठेवेन.
“प्रत्येक चांगल्या-वाईट प्रसंगी माझ्या पाठीशी खंबीरपणे उभ्या राहिलेल्या आणि माझ्यासाठी असंख्य त्याग केलेल्या माझ्या कुटुंबाचे मी आभार मानते. मला माझी सर्वोत्तम कामगिरी करण्यासाठी प्रेरित करणाऱ्या प्रशिक्षकांचे, सहकारी खेळाडूंचे आणि सहाय्यक कर्मचाऱ्यांचेही आभार. त्यांच्यासोबत ड्रेसिंग रूम शेअर करण्याची संधी मला मिळाली. चाहत्यांचेही आभार, ज्यांच्या टाळ्या आणि उत्साहाने प्रत्येक टप्प्यावर मला ऊर्जा दिली.”
तिने पुढे लिहिले, “भारतीय क्रिकेट नियामक मंडळ (बीसीसीआय), आंध्र क्रिकेट संघ, रॉयल चॅलेंजर्स बेंगळुरू, गुजरात जायंट्स आणि रेल्वे क्रीडा प्रोत्साहन मंडळाप्रती मी मनापासून कृतज्ञता व्यक्त करू इच्छिते. माझ्या संपूर्ण कारकिर्दीत त्यांनी दिलेल्या सातत्यपूर्ण सहकार्याबद्दल, मार्गदर्शनाबद्दल आणि पाठिंब्याबद्दल धन्यवाद. सर्वोच्च स्तरावर माझी आवड जोपासण्यासाठी व्यासपीठ आणि संधी उपलब्ध करून दिल्याबद्दल मी त्यांची आभारी आहे.
“एक खेळाडू म्हणून माझा प्रवास संपत असला, तरी क्रिकेटसोबतचे माझे नाते कधीही तुटणार नाही. मी नेहमीच या खेळाशी घट्ट जोडलेली राहीन. या खेळाने मला सर्व काही दिले आहे. त्यामुळे आता खेळाला काहीतरी परत देण्यासाठी, पुढील पिढीतील खेळाडूंना मार्गदर्शन करण्यासाठी आणि या खेळाची सेवा करण्यासाठी माझे आयुष्य समर्पित करण्याचा माझा मानस आहे. धन्यवाद, क्रिकेट! तू नेहमीच माझ्या हृदयात, माझ्या आवडीत आणि आयुष्यभराच्या ध्येयात राहशील.”
महिला प्रीमियर लीगच्या पहिल्या हंगामात गुजरात जायंट्सने मेघनाला आपल्या संघात स्थान दिले होते. २०२४ मध्ये ती रॉयल चॅलेंजर्स बेंगळुरू संघात दाखल झाली. त्याच वर्षी विजेतेपद पटकावणाऱ्या संघाची ती सदस्य होती.
