संगमेश्वर/ दिनेश आंब्रे : समाजसेवा मंडळ संस्था परचुरी दुदमवाडी यांच्या वतीने वांद्री येथील प्राथमिक आरोग्य केंद्र परिसरात भव्य स्वच्छता अभियान राबवून सामाजिक बांधिलकीचा आदर्श निर्माण करण्यात आला. या स्वच्छता उपक्रमाचे अधिकृत उद्घाटन वैद्यकीय अधिकारी डॉ. साजन मोहिते यांच्या शुभहस्ते संपन्न झाले. मंडळाच्या स्थापनेला ३२ वर्षे पूर्ण झाल्याच्या निमित्ताने आयोजित करण्यात आलेला हा ३२ वा उपक्रम ठरला असून, सकाळी १० ते दुपारी २ या वेळेत मंडळाच्या ३३ सेवेकरी बंधू-भगिनींनी अखंड श्रमदान करून संपूर्ण रुग्णालय परिसर चकाचक केला.
याप्रसंगी बोलताना वैद्यकीय अधिकारी डॉ. मोहिते यांनी वांद्री उपकेंद्रातील सेवेचे हे तिसरे वर्ष असल्याचे सांगत, स्वच्छता सेवा हीच खरी देशसेवा असून अशा समाजोपयोगी कार्यामुळे देशाच्या उभारणीत मोठा हातभार लागतो, असे गौरवौद्गार काढले. या कार्यक्रमादरम्यान डॉ. साजन मोहिते यांनी समाजसेवा मंडळाच्या पदाधिकाऱ्यांचा पुष्पगुच्छ देऊन सत्कार केला, तसेच प्राथमिक आरोग्य केंद्राच्या वतीने मंडळाचे अध्यक्ष वसंत दुदम यांच्याकडे अधिकृत सन्मानपत्र सुपूर्द करून मंडळाच्या भावी वाटचालीस मनःपूर्वक शुभेच्छा दिल्या.
या स्वच्छता मोहिमेत मंडळाचे अध्यक्ष वसंत दुदम, उपाध्यक्ष दिनेश दुदम, सेक्रेटरी शिवाजी दुदम यांच्यासह समाजसेवक वसंत मेस्त्री, जगन्नाथ दुदम, ममता दुदम यांच्यासह ३३ सेवेकरी तसेच स्थानिक हॉस्पिटलचे कर्मचारी मोठ्या संख्येने सहभागी झाले होते. सर्वांच्या सक्रिय सहभागातून पार पडलेल्या या अभियानाचे परिसरात सर्वत्र कौतुक होत आहे.
