रत्नागिरी : मुंबई विद्यापीठांतर्गत आयोजित कोकण विभाग क्रमांक चारच्या आंतरमहाविद्यालयीन महिला कबड्डी स्पर्धेत रत्नागिरीच्या गोगटे जोगळेकर महाविद्यालय (स्वायत्त) महिला संघाने चमकदार कामगिरी करत रौप्य पदकासह उपविजेतेपदावर नाव कोरले आहे. कोकण विभाग आणि ज्ञानदीप कॉलेज ऑफ सायन्स आणि कॉमर्स, भातगाव (खेड) यांच्या संयुक्त विद्यमाने २८ सप्टेंबर ते १ ऑक्टोबर २०२६ दरम्यान डेरवण येथील एस.व्ही.जे.सी.टी. स्पोर्ट्स कॅम्पसमध्ये या चुरशीच्या स्पर्धा पार पडल्या. या प्रतिष्ठेच्या स्पर्धेत कोकणातील विविध महाविद्यालयांना मागे टाकत गोगटे जोगळेकर महाविद्यालयाच्या संघाने सन २०२६-२७ चे सांघिक उपविजेतेपद पटकावत द्वितीय क्रमांक संपादन केला.
उपविजेतेपद मिळवणाऱ्या या संघात कर्णधार व खेळाडू म्हणून नंदिनी कोचारे (एम.ए.), बिस्ना थापा, अमिता गावडे, आकांशा भातडे, सानिया शेख (सर्व तृतीय वर्ष कला), मैथिली गावकर, त्रिशा मोहिते, सायली डांगे, प्राची भोंगले (सर्व प्रथम वर्ष वाणिज्य), चंदना वाकडे, सलोनी कांबळे, अपूर्वा गुरव (सर्व प्रथम वर्ष कला) तसेच श्रावणी शेलार आणि श्रावणी शिंदे (दोन्ही द्वितीय वर्ष विज्ञान) या विद्यार्थिनींनी मोलाचे योगदान दिले. संघाला महाविद्यालयाचे क्रीडा संचालक डॉ. विनोद शिंदे यांचे बहुमूल्य मार्गदर्शन तर क्रीडा शिक्षक प्रा. कल्पेश बोटके, श्री. सचिन साळवी आणि श्री. दत्तात्रय किर यांचे सहकार्य लाभले. या उल्लेखनीय यशाबद्दल र. ए. सोसायटीच्या कार्याध्यक्षा श्रीम. शिल्पाताई पटवर्धन, कार्यवाह श्री. सतीशजी शेवडे, जिमखाना समितीचे अध्यक्ष डॉ. चंद्रशेखर केळकर, संस्थेचे सर्व सन्माननीय सदस्य, महाविद्यालयाचे प्राचार्य डॉ. मकरंद साखळकर, प्रशासकीय उपप्राचार्य डॉ. सुरेंद्र ठाकूरदेसाई, तिन्ही शाखांचे उपप्राचार्य, डॉ. विवेक भिडे यांच्यासह सर्व प्राध्यापक आणि शिक्षकेतर कर्मचाऱ्यांनी खेळाडूंचे अभिनंदन करून त्यांच्या पुढील वाटचालीस शुभेच्छा दिल्या आहेत.
