रत्नागिरी : समाजाच्या विविध क्षेत्रांत निस्वार्थी आणि निरलस भावनेने मोलाचे योगदान देणाऱ्या कर्तृत्ववान महिलांचा गौरव करण्यासाठी स्वामी स्वरूपानंद सेवा मंडळ, पावसतर्फे दरवर्षी दिला जाणारा मानाचा ‘स्वरूपयोगिनी पुरस्कार’ यंदा जाहीर झाला आहे. रत्नागिरीतील अध्यात्म मंदिर येथे संपन्न होणाऱ्या या पुरस्कार सोहळ्याचे हे सहावे वर्ष असून, सलग तीन दिवस हा गौरव सोहळा रंगणार आहे. या अंतर्गत रविवार, ११ ऑक्टोबर रोजी निवृत्त शिक्षिका सौ. प्रतिभा प्रभुदेसाई, सोमवार, १२ ऑक्टोबर रोजी यशस्वी उद्योजिका सौ. माधुरी कळंबटे आणि मंगळवार, १३ ऑक्टोबर रोजी उद्योजिका सौ. उमा देवळे यांना हा प्रतिष्ठेचा पुरस्कार प्रदान करून सन्मानित केले जाणार आहे.
पुरस्कारार्थींपैकी सौ. प्रतिभा प्रभुदेसाई यांनी अध्यापन क्षेत्रातून निवृत्त झाल्यानंतरही निरपेक्ष वृत्तीने आपल्या ‘संतुलन’ केंद्राच्या माध्यमातून तब्बल एक तप अविरत समाजकार्य सुरू ठेवले आहे. सौ. माधुरी कळंबटे यांनी पती प्रतिक कळंबटे यांच्या साथीने नरबे येथे भव्य नर्सरी उद्योग उभारला असून, त्या दरवर्षी सुमारे एक ते दीड लाख सोनचाफ्याच्या कलमांची यशस्वी विक्री करतात. तर सौ. उमा देवळे या पतीसमवेत ऑटोमोबाईल लॅम्प निर्मितीच्या कारखान्याची धुरा सांभाळण्यासोबतच विश्व हिंदू परिषदेच्या सामाजिक उपक्रमांमध्येही अग्रेसर राहून योगदान देत आहेत. या तिन्ही दिवशी पुरस्कार वितरणासोबतच सौ. सायली गोडबोले – जोशी यांचे ‘महाभारतातील स्त्री पर्व’ या विषयावर अभ्यासपूर्ण व्याख्यान आयोजित करण्यात आले असून, या वैचारिक आणि प्रेरणादायी सोहळ्याला नागरिकांनी मोठ्या संख्येने उपस्थित राहावे, असे आवाहन स्वामी स्वरूपानंद सेवा मंडळ, पावस यांनी केले आहे.
