जालगाव पांगारवाडीतील धक्कादायक घटना; संशयित मुलाला पोलिसांनी घेतले ताब्यात
दापोली : तालुक्यातील जालगाव पांगारवाडी येथे मुलानेच आपल्या आई-वडिलांवर कुऱ्हाड आणि काचेच्या बाटलीच्या सहाय्याने जीवघेणा हल्ला केल्याची धक्कादायक घटना बुधवार, २३ सप्टेंबर रोजी दुपारी सव्वादोन वाजण्याच्या सुमारास घडली. या हल्ल्यात मधुकर आग्रे आणि अनिता आग्रे हे दोघेही गंभीर जखमी झाले आहेत.
मिळालेल्या प्राथमिक माहितीनुसार, सुनील आग्रे (वय ४०) याने आपल्या वडील मधुकर आग्रे यांच्या डोक्यावर व हातावर कुऱ्हाडीने हल्ला केला. तसेच आई अनिता आग्रे यांच्या डोक्यावर काचेच्या बाटलीच्या सहाय्याने मारहाण केल्याचे समोर आले आहे. हा प्रकार मधुकर आग्रे यांच्या राहत्या घरातच घडल्याने परिसरात एकच खळबळ उडाली.
हल्ल्यात मधुकर आग्रे आणि अनिता आग्रे यांच्या शरीरावर अनेक ठिकाणी दुखापत झाली आहे. घटनेनंतर दोन्ही जखमींना तातडीने उपचारासाठी दापोली उपजिल्हा रुग्णालयात दाखल करण्यात आले. तेथे त्यांच्यावर प्राथमिक उपचार करण्यात आले असून, दुखापतीचे गांभीर्य लक्षात घेता पुढील उपचारांसाठी त्यांना रत्नागिरी येथील जिल्हा शासकीय रुग्णालयात पाठवण्यात येणार असल्याची माहिती मिळत आहे.
भरदिवसा राहत्या घरातच आई-वडिलांवर हल्ला झाल्याची माहिती परिसरात पसरताच जालगाव पांगारवाडी परिसरात काही काळ तणावाचे वातावरण निर्माण झाले. घटनेची माहिती मिळताच पोलिसांनी घटनास्थळी धाव घेत प्रकरणाची दखल घेतली. पोलिसांनी सुनील आग्रे याला ताब्यात घेतले असून घटनेचा तपास सुरू केला आहे.
दरम्यान, या हल्ल्यामागील नेमके कारण अद्याप स्पष्ट झालेले नाही. कौटुंबिक वादातून हा प्रकार घडला की अन्य कोणत्या कारणामुळे हल्ला करण्यात आला, याचा तपास पोलिसांकडून करण्यात येत आहे. घटनास्थळाचा पंचनामा तसेच अन्य आवश्यक तपासाची प्रक्रिया सुरू असून, पोलिसांच्या तपासानंतर या घटनेमागील नेमके कारण स्पष्ट होणार आहे.
