संगमेश्वर: कोळंबे परिसर विद्या प्रसारक मंडळ संचालित श्रीमती कमळजाबाई पांडुरंग मुळये हायस्कूल व ज्युनिअर कॉलेजच्या (कोळंबे, ता. संगमेश्वर) विद्यार्थ्यांनी जिल्हास्तरीय शालेय क्रीडा स्पर्धेत चमकदार कामगिरी करत प्रशालेचा नावलौकिक वाढवला आहे. विविध क्रीडा प्रकारांमध्ये येथील खेळाडूंनी प्रतिस्पर्ध्यांवर मात करत आपले वर्चस्व सिद्ध केले.
या स्पर्धेतील १९ वर्षे वयोगटातील भालाफेक प्रकारात विद्यालयाचा खेळाडू कुमार नितेज रामचंद्र झोरे याने उत्कृष्ट क्रीडकौशल्याचे प्रदर्शन करत जिल्ह्यात द्वितीय क्रमांक पटकावला. या घवघवीत यशामुळे त्याची पुढील टप्प्यातील विभागीय शालेय क्रीडा स्पर्धेसाठी निवड झाली आहे. नितेजच्या या यशामुळे संगमेश्वर तालुक्यासह कोळंबे परिसराच्या क्रीडा क्षेत्रात आनंदाचे वातावरण निर्माण झाले आहे.
या यशाबद्दल कोळंबे परिसर विद्या प्रसारक मंडळाचे सर्व पदाधिकारी, शालेय व्यवस्थापन समिती, विद्यालयाचे मुख्याध्यापक श्री. खांबे सर, सर्व शिक्षक वृंद, शिक्षकेतर कर्मचारी, क्रीडा शिक्षक सौ. मुळये मॅडम यांच्यासह स्थानिक ग्रामस्थ व पालकांनी नितेज झोरे व यशस्वी खेळाडूंचे मनःपूर्वक अभिनंदन केले आहे. तसेच आगामी विभागीय क्रीडा स्पर्धेतील कामगिरीसाठी त्याला शुभेच्छा दिल्या आहेत.
