रत्नागिरी : बोनस, थकीत वेतनासाठी वीज कंत्राटी कामगारांची २७ ऑक्टोबरला निदर्शन

रत्नागिरी: दिवाळीपूर्वी बोनस, थकीत वेतन, रोजगार सुरक्षा आणि अन्य प्रलंबित मागण्यांसाठी भारतीय मजदूर संघाशी संलग्न महाराष्ट्र वीज कंत्राटी कामगार संघ २७ ऑक्टोबरला रत्नागिरी जिल्ह्यासह राज्यभरातील महावितरण कार्यालयांसमोर निदर्शने करणार आहेत.

मागण्या मान्य झाल्या नाहीत, तर ६ नोव्हेंबरपासून बेमुदत कामबंद आंदोलन करण्याचा इशारा संघटनेने दिला आहे.

संघटनेची प्रदेश कार्यकारिणी बैठक ३ व ४ ऑक्टोबरला पुणे येथे झाली. या बैठकीत राज्यभरातील ८० पदाधिकाऱ्यांनी भाग घेतला. क्रिस्टल, स्मार्ट एजन्सीसह सर्व कंत्राटी कामगारांना दिवाळीपूर्वी बोनस, वेतन व थकीत फरकाची रक्कम मिळावी, जादा कामाचा मोबदला आणि मेडिक्लेम सुविधा द्यावी, अशा प्रमुख मागण्या करण्यात आल्या. कंत्राटदार बदलला तरी विद्यमान कामगारांना सेवाज्येष्ठतेनुसार रोजगार कायम ठेवावा, बदली धोरण रद्द करावे तसेच कंत्राटदारांनी एकतर्फी कामगारकपात करू नये, अशीही संघटनेची मागणी आहे.

न्यायालयीन संरक्षण असलेल्या कमी केलेल्या कामगारांना तत्काळ कामावर घेऊन त्यांची यादी संपर्क पोर्टलवर जाहीर करावी, अशी मागणीही करण्यात आली. अध्यक्ष नीलेश खरात यांनी अनेक कामगारांना अनेक महिन्यांपासून वेतन व थकीत फरक मिळालेला नसल्याचे सांगितले. प्रशासनाकडून केवळ आश्वासने मिळत असून प्रत्यक्ष कार्यवाही होत नसल्याने दिवाळीत आंदोलनाचा निर्णय घ्यावा लागत असल्याचे त्यांनी नमूद केले. येत्या २७ ऑक्टोबरला रत्नागिरी जिल्ह्यातील महावितरण कार्यालयांसमोर तसेच मुंबईतील प्रकाशगड येथे निदर्शने करण्यात येणार आहेत.