संगमेश्वर : तालुक्यातील नायरी मार्गावरील कळंबस्ते कातकरी आंबा परिसरात दुचाकी आणि चारचाकी वाहनामध्ये समोरासमोर झालेल्या जोरदार अपघातात दोघेजण जखमी झाले आहेत. हा अपघात रविवार, ११ ऑक्टोबर रोजी सायंकाळी पावणेपाच वाजण्याच्या सुमारास घडला. धडक इतकी भीषण होती की दोन्ही वाहनांचे टायर फुटून रिंगांचे मोठे नुकसान झाले असून काही काळ मार्गावरील वाहतूक विस्कळीत झाली होती.
मिळालेल्या माहितीनुसार, अनिकेत घोरपडे यांच्या ताब्यातील दुचाकी आणि नितेश घोरपडे चालवत असलेली ‘एमएच ४६ डीएफ ०१२५’ क्रमांकाची कार यांच्यात कातकरी आंबा परिसरातील धोकादायक वळणावर समोरासमोर जोराची धडक बसली. या अपघातात दुचाकीस्वार अनिकेत घोरपडे यांच्या उजव्या पायाला गंभीर दुखापत झाली, तर कारमधील करण यांच्या डोक्याला मार लागला आहे. अपघातानंतर स्थानिक नागरिकांच्या मदतीने दोन्ही जखमींना तातडीने उपचारासाठी संगमेश्वर ग्रामीण रुग्णालयात दाखल करण्यात आले. या जोरदार धडकेमुळे कारच्या उजव्या बाजूचे टायर फुटून रिंग निकामी झाली, तर दुचाकीचा पुढचा टायर फुटून त्याची रिंग वाकल्याने दोन्ही वाहनांचे अतोनात नुकसान झाले.
अपघाताची बातमी समजताच संगमेश्वर पोलिसांनी तत्काळ घटनास्थळी धाव घेऊन अपघातग्रस्त वाहने रस्त्यावरून बाजूला केली आणि ठप्प झालेली वाहतूक पूर्ववत सुरू केली. दरम्यान, अपघातग्रस्त दोन्ही वाहने ही एकाच कुटुंबातील व्यक्तींची असल्याची प्राथमिक माहिती समोर आली आहे. त्यामुळे या प्रकरणी पोलीस ठाण्यात अधिकृत तक्रार नोंदवली गेली आहे अथवा नाही, याबाबत सविस्तर माहिती मिळू शकली नसून अपघाताचे नेमके कारण अद्याप अस्पष्ट आहे.
