दापोली : घराशेजारील झाडाच्या फांद्या छाटताना आठ फूट उंच कंपाऊंडच्या भिंतीवरून तोल जाऊन खाली फरशीवर कोसळल्याने ६८ वर्षीय वृद्धाचा जागीच गंभीर जखमी होऊन मृत्यू झाल्याची दुर्दैवी घटना गंधर्वनगरी येथे घडली आहे. प्रदीप राजाराम शिगवण (वय ६८, रा. गंधर्वनगरी, ता. दापोली) असे मृत वृद्धाचे नाव आहे.
मिळालेल्या माहितीनुसार, प्रदीप शिगवण हे रविवार, ११ ऑक्टोबर २०२६ रोजी सकाळी सव्वादहाच्या सुमारास आपल्या घराच्या बाजूला असलेल्या सुमारे आठ फूट उंचीच्या वॉल कंपाऊंडच्या भिंतीवर चढून शेवग्याच्या झाडाच्या फांद्या तोडत होते. झाडाच्या फांद्या छाटत असताना अचानक त्यांचा तोल गेला आणि ते शेजारी राहणारे सागर गजानन वरवटकर यांच्या घराच्या मागील बाजूस असलेल्या लादी बसविलेल्या पक्क्या अंगणात जोराने आदळले. उंचीवरून थेट फरशीवर पडल्याने त्यांच्या डोक्याला व तोंडाला गंभीर मार लागून नाकातोंडातून मोठ्या प्रमाणावर रक्तस्राव सुरू झाला. हा प्रकार लक्षात येताच स्थानिक रहिवाशांनी त्यांना तात्काळ उपचारांसाठी दापोली येथील उपजिल्हा रुग्णालयात दाखल केले. मात्र, रुग्णालयातील वैद्यकीय अधिकाऱ्यांनी प्राथमिक तपासणीअंती उपचारादरम्यान त्यांना मृत घोषित केले. या घटनेची नोंद दापोली पोलीस ठाण्यात दुपारी पावणेतीन वाजता भारतीय नागरिक सुरक्षा संहिता (BNSS) कलम १९४ अन्वये आकस्मिक मृत्यू क्रमांक ७६/२०२६ अशी करण्यात आली असून, या दुर्दैवी घटनेमुळे गंधर्वनगरी परिसरात हळहळ व्यक्त केली जात आहे. दापोली पोलीस या प्रकरणाचा पुढील तपास करत आहेत.
