संगमेश्वर (दिनेश अंब्रे): गणेशोत्सवाचे औचित्य साधून युवासेना संगमेश्वर तालुक्याच्या वतीने आयोजित करण्यात आलेल्या भव्य ‘मखर सजावट स्पर्धा २०२६’ चा निकाल नुकताच अत्यंत उत्साही वातावरणात जाहीर करण्यात आला. तालुक्यातील स्थानिक कलागुणांना हक्काचे व्यासपीठ मिळवून देणाऱ्या या स्पर्धेत प्रज्वल शिगवण यांनी आपल्या उत्कृष्ट कलाकृतीचे दर्शन घडवत प्रथम क्रमांकाचा बहुमान पटकावला.
तालुक्यातील एकूण ६० कल्पक स्पर्धकांनी या स्पर्धेत सहभाग नोंदवून उत्स्फूर्त प्रतिसाद दिला होता. स्पर्धकांनी पर्यावरणपूरक साहित्य, आकर्षक रोषणाई आणि सामाजिक संदेश देणाऱ्या विविध संकल्पनांवर आधारित मनमोहक मखर सजावट साकारली होती. अत्यंत चुरशीच्या ठरलेल्या या स्पर्धेत प्रज्वल शिगवण यांनी प्रथम, मृणाल खापरे यांनी द्वितीय तर रोशन रमणे यांनी तृतीय क्रमांक संपादन केला. याशिवाय यश उजगावकर यांनी चतुर्थ आणि अभिषेक खातू यांनी पाचवा क्रमांक पटकावत यश मिळवले. या संपूर्ण स्पर्धेचे निष्पक्ष व काटेकोर परीक्षण विलास रहाटे यांनी पार पाडले.
निकालाच्या या विशेष सोहळ्यास माजी आमदार सुभाष बने, महाराष्ट्र राज्य क्रिकेट असोसिएशनचे सदस्य तथा युवासेना राज्य कार्यकारिणी सदस्य अपूर्व सामंत प्रमुख पाहुणे म्हणून उपस्थित होते. त्यांच्या समवेत राजेंद्र महाडिक, कृष्ण हरेकर आणि ऋतुजा कदम आदी मान्यवर उपस्थित होते. उपस्थितांनी सर्व विजेत्यांसह स्पर्धेत सहभागी झालेल्या सर्व साठ कलाकारांच्या कल्पकतेचे भरभरून कौतुक करत त्यांना पुढील कलाप्रवासासाठी शुभेच्छा दिल्या. गणेशोत्सवाच्या परंपरेला सामाजिक आणि कलात्मक जोड देणाऱ्या युवासेनेच्या या स्तुत्य उपक्रमाचे संगमेश्वर तालुक्यातून सर्वत्र स्वागत होत आहे.
