चिपळूण : सहकार क्षेत्रात संस्थात्मक शिस्त, पारदर्शकता आणि सर्वसामान्यांना आर्थिक बळ देण्याच्या ध्येयाने कार्यरत असणाऱ्या चिपळूण नागरी सहकारी पतसंस्थेच्या शिरपेचात आणखी एक मानाचा तुरा रोवला गेला आहे. महाराष्ट्र राज्य सहकारी संघ, पुणे यांची सहयोगी संस्था म्हणून चिपळूण नागरी सहकारी पतसंस्थेला अधिकृत सहकार प्रशिक्षण केंद्र म्हणून मान्यता प्रदान करण्यात आली आहे. या महत्त्वपूर्ण निर्णयामुळे संस्थेच्या कार्याला नवी दिशा मिळाली असून रत्नागिरी जिल्ह्यातील संपूर्ण सहकार चळवळीच्या प्रशिक्षण व्यवस्थेला मोठे बळ मिळणार आहे. या मान्यतेबद्दल संस्थेचे संस्थापक-अध्यक्ष सुभाषराव चव्हाण आणि मुख्य कार्यकारी अधिकारी स्वप्ना यादव यांनी महाराष्ट्र राज्य सहकारी संघाचे अध्यक्ष आमदार प्रवीण दरेकर व मुख्य कार्यकारी अधिकारी राजेंद्र दरडे यांचे विशेष आभार मानले आहेत.
‘आपली माणसं… आपली संस्था’ हे ब्रीदवाक्य जपत वाटचाल करणाऱ्या चिपळूण नागरी सहकारी पतसंस्थेने केवळ ठेवी आणि कर्जापुरते मर्यादित न राहता सातत्याने सहकारविषयक प्रशिक्षण आणि प्रबोधनावर भर दिला होता. आता राज्य सहकारी संघाची अधिकृत सहयोगी मान्यता मिळाल्यामुळे या प्रशिक्षण उपक्रमांना संस्थात्मक स्वरूप प्राप्त झाले आहे. या अधिकृत केंद्राच्या माध्यमातून जिल्ह्यातील पगारदार सहकारी संस्था, गृहनिर्माण संस्था, नागरी व ग्रामीण पतसंस्थांसह विविध सहकारी संस्थांमधील संचालक मंडळ, पदाधिकारी, अधिकारी आणि कर्मचाऱ्यांना सहकाराचे नियम, वैधानिक जबाबदाऱ्या, संस्थात्मक व्यवस्थापन, ताळेबंद आणि पारदर्शक कारभाराचे शास्त्रशुद्ध धडे दिले जाणार आहेत.
बदलत्या काळात संस्थांची कार्यक्षमता वाढवण्यासाठी आणि आधुनिक आव्हानांना सामोरे जाण्यासाठी प्रशिक्षित मनुष्यबळाची नितांत गरज असते. ही गरज ओळखून सहकार क्षेत्रातील अनुभवी व्यक्तींचे मार्गदर्शन आणि या क्षेत्रात करिअर करू इच्छिणाऱ्या नव्या पिढीची ऊर्जा यांचा मेळ घालत व्यावसायिक दृष्टिकोन रुजवण्यासाठी हे केंद्र महत्त्वपूर्ण ठरेल. सहकार क्षेत्रातील ज्ञान, कौशल्य आणि प्रत्यक्ष अनुभवाची सांगड घालून तळागाळातील संस्था सक्षम करण्याचा मार्ग यामुळे सुकर झाला असून, या ऐतिहासिक निर्णयाचे जिल्ह्यातील सहकार वर्तुळातून जोरदार स्वागत केले जात आहे.
