केळवली, धावडेवाडी व माचाळ परिसरातील रस्त्यांची डागडुजीने ग्रामस्थांना मिळाला मोठा दिलासा

प्रभानवल्ली/सिकंदर फरास : पावसाळ्यादरम्यान खराब झालेल्या आणि प्रवाशांसाठी त्रासदायक ठरलेल्या केळवली, धावडेवाडी आणि माचाळ परिसरातील रस्त्यांची आज आमदार किरण सामंत यांच्या मार्गदर्शनाखाली आणि लोकसहभागातून यशस्वी डागडुजी करण्यात आली. प्रभानवल्ली पंचायत समितीचे सदस्य उमेश दादा पत्की यांनी ग्रामपंचायत पालु यांच्या माध्यमातून महत्त्वाचा उपक्रम राबवण्यात आला.

पावसाळ्यामध्ये या भागातील रस्त्यांना मोठे खड्डे पडले होते, ज्यामुळे वाहनचालक व ग्रामस्थांना प्रवासात मोठा त्रास सहन करावा लागत होता. याची दखल घेत उमेश दादा पत्की यांनी आमदार किरण सामंत यांच्याकडे रस्त्यांच्या दुरुस्तीची मागणी केली होती. या मागणीला सकारात्मक प्रतिसाद देत मिळालेल्या मार्गदर्शनामुळे या कामाला तातडीने गती मिळाली.
या मोहिमेदरम्यान जेसीबीच्या साहाय्याने खड्डे पडलेल्या रस्त्यांवर माती भरण्यात आली. तसेच, माचाळ भागातील रस्त्याच्या कडेला पडलेले लहान-मोठे दगड वाहनांना अडथळा ठरणार नाही अशा सुरक्षित ठिकाणी हटवण्यात आले. याशिवाय रस्त्यावर वाढलेली झाडीझुडपेही साफ करण्यात आली, ज्यामुळे आता रस्ते वाहतुकीसाठी सुरळीत झाले आहेत.

रस्त्यांच्या या तत्पर डागडुजीमुळे ग्रामस्थांचा प्रवास सुकर झाला असून, स्थानिक नागरिकांनी आमदार किरण सामंत आणि उमेश दादा पत्की यांचे विशेष आभार मानले आहेत.