दोन महिन्यांची मेहनत; संगमेश्वरात खातू बंधूंनी साकारली ‘जुनी मुंबई ते नवी मुंबई’!

कल्पनेपासून प्रत्यक्ष देखाव्यापर्यंत कुटुंबाची एकजूट; मराठी अस्मिता आणि मुंबईच्या संस्कृतीचा अनोखा कलाविष्कार

धामणी : नमन-जाखडी, भजन-कीर्तन आणि समृद्ध गणेशोत्सवाची सांस्कृतिक परंपरा जपणाऱ्या संगमेश्वरात यंदा खातू बंधूंच्या मेहनतीचा आणि कल्पकतेचा अनोखा आविष्कार पाहायला मिळत आहे. ‘जुनी मुंबई ते नवी मुंबई’ हा भव्य देखावा साकारण्यासाठी खातू कुटुंबाने तब्बल दोन महिने सातत्याने मेहनत घेतली असून, कल्पना, नियोजन, निर्मिती आणि सजावट अशा प्रत्येक टप्प्यावर कुटुंबातील सदस्यांनी खांद्याला खांदा लावून काम केले आहे.

गणेशोत्सवाच्या काही दिवसांपूर्वीच देखाव्याची संकल्पना निश्चित करून त्याच्या प्रत्यक्ष उभारणीला सुरुवात करण्यात आली. दिवस-रात्र वेळ देत, बारकावे तपासत आणि अनेकदा बदल करत खातू बंधूंनी हा देखावा आकाराला आणला. केवळ सजावट म्हणून नव्हे, तर पाहणाऱ्याला मुंबईचा इतिहास आणि मराठी माणसाची अस्मिता अनुभवता यावी, या उद्देशाने प्रत्येक भाग विचारपूर्वक तयार करण्यात आला.

‘गिरणगावाचा घाम, दहीहंडीचा जल्लोष, गणपतीची भक्ती, शिवरायांची प्रेरणा आणि आधुनिकतेची झेप… हाच आमचा मुंबईचा अभिमान!’ या संकल्पनेतून जुन्या मुंबईतील गिरणगाव, कष्टकरी जीवन, दहीहंडीचा जल्लोष, गणेशभक्ती आणि छत्रपती शिवाजी महाराजांची प्रेरणा यांचे दर्शन घडते. त्याचवेळी आधुनिक नवी मुंबईची झपाट्याने बदलणारी ओळखही या देखाव्यातून मांडण्यात आली आहे.

‘मुंबई… फक्त शहर नाही, तर मराठी माणसाच्या अस्मितेची साक्ष आहे,’ हा विचार या देखाव्याचा गाभा आहे. संगमेश्वरच्या सांस्कृतिक मातीत मुंबईचा हा प्रवास साकारताना परंपरा आणि आधुनिकता यांचा सुरेख मेळ साधण्याचा प्रयत्न करण्यात आला आहे.

या देखाव्याच्या निर्मितीत शंकर खातू, अभिषेक खातू, शिवांश खातू, श्वेता खातू, शशांक खातू, शुभम खातू आणि यश खातू यांनी मोलाची भूमिका बजावली. प्रत्येकाने आपल्या परीने जबाबदारी स्वीकारत दोन महिन्यांच्या मेहनतीत योगदान दिले. त्यामुळे हा देखावा केवळ एका व्यक्तीची कल्पना न राहता संपूर्ण खातू कुटुंबाच्या एकजुटीचे आणि मेहनतीचे प्रतीक ठरला आहे.

“हा देखावा उभा करण्यासाठी दोन महिने सातत्याने मेहनत घेतली. वेळ, श्रम आणि कल्पकता यांचा कस लागला; मात्र अंतिम रूप पाहिल्यानंतर सगळा थकवा दूर झाला. संगमेश्वरच्या गणेशोत्सवात काहीतरी वेगळे आणि अर्थपूर्ण सादर करावे, तसेच मुंबईची संस्कृती आणि मराठी अस्मिता पुढच्या पिढीपर्यंत पोहोचावी, या भावनेतून हा देखावा साकारला,” अशी भावना अभिषेक खातू यांनी व्यक्त केली.

कुटुंबाची एकजूट, दोन महिन्यांचा अथक परिश्रम आणि सांस्कृतिक विषयाची कल्पक मांडणी यामुळे खातू बंधूंचा ‘जुनी मुंबई ते नवी मुंबई’ हा देखावा संगमेश्वरच्या गणेशोत्सवातील लक्षवेधी कलाविष्कार ठरत आहे.