देवरुख : रानगव्याच्या हल्ल्यात मृत्यू झालेल्या स्वप्नील पेडामकरच्या कुटुंबाला वनविभागाची १० लाखांची मदत

देवरुख : देवरुख-रत्नागिरी मार्गावरील आंबव येथे सप्टेंबरच्या पहिल्या आठवड्यात रानगव्याने केलेल्या हल्ल्यात गंभीर जखमी झालेल्या साडवली येथील तरुण स्वप्नील पेडामकर यांचा उपचारादरम्यान मृत्यू झाला होता. या दुर्दैवी घटनेनंतर वनविभागाने पेडामकर कुटुंबाला आर्थिक मदतीचा हात देत १० लाख रुपयांचा धनादेश स्वप्नील यांच्या आईकडे सुपूर्द केला.

रत्नागिरी-चिपळूण विभागीय वनाधिकारी गिरिजा देसाई आणि सहाय्यक वनसंरक्षक प्रियांका लगड यांच्या मार्गदर्शनाखाली ही मदत देण्यात आली. वन्यप्राण्याच्या हल्ल्यात कुटुंबातील तरुण गमावल्यानंतर आर्थिक संकटाचा सामना करणाऱ्या पेडामकर कुटुंबाला या मदतीमुळे काहीसा दिलासा मिळाला आहे.

स्वप्नील यांच्या अपघातानंतर त्यांना तातडीने शासकीय मदत मिळावी यासाठी आमदार किरण सामंत आणि आमदार शेखर निकम यांनी पाठपुरावा केला होता. तसेच स्वप्नीलच्या उपचारासाठी सह्याद्री नगर मित्रमंडळानेही पुढाकार घेतला होता. मंडळाने आपला पारंपरिक दहीहंडी उत्सव रद्द करून त्यासाठीचा निधी स्वप्नीलच्या उपचारासाठी देण्याचा निर्णय घेतला होता. मात्र उपचार सुरू असतानाच स्वप्नील यांची प्राणज्योत मालवली.

वनविभागाकडून धनादेश सुपूर्द करण्यात आला त्यावेळी परिक्षेत्र वन अधिकारी विक्रम गुरव, संगमेश्वर-देवरुखचे वनपाल सागर गोसावी तसेच वनरक्षक सहयोग कराडे, आकाश कडूकर, सुरज तेली आणि सुप्रिया काळे उपस्थित होते. यावेळी सुरेश उर्फ बारक्याशेठ बने, पप्पू नाखरेकर, संजय लाड, पापा शेठ भिंगार्डे, बंधू सुर्वे, विनोद वाडकर, सचिन मांगले, प्रमोद सुर्वे, निलेश भुवड, भाई चव्हाण, विशाल भानुशाली यांच्यासह स्थानिक ग्रामस्थ उपस्थित होते.

वनविभागाकडून मिळालेल्या १० लाख रुपयांच्या मदतीमुळे पेडामकर कुटुंबाला आर्थिक आधार मिळाला असला, तरी स्वप्नीलच्या दुर्दैवी निधनाने साडवलीसह देवरुख परिसरात हळहळ व्यक्त होत आहे.