रत्नागिरी : नॅशनल कॅडेट कॉर्प्स (एनसीसी) महाराष्ट्र निर्देशालयाच्या वतीने आयोजित करण्यात आलेल्या दहा दिवसांच्या ‘प्री-मेन्यू’ (महाराष्ट्र नवल युनिट) प्रशिक्षण शिबिराचा रत्नागिरीत यशस्वी समारोप झाला आहे. आगामी ‘मेन्यू २७’ ओपन सी सेलिंग या सागरी नौकावहन मोहिमेची पूर्वतयारी म्हणून पार पडलेल्या या खडतर शिबिरात राज्यातील १२० कॅडेट्सनी सहभाग नोंदवून प्रगत सागरी कौशल्ये आत्मसात केली. मुंबई, पुणे, नागपूर आणि छत्रपती संभाजीनगर या चारही एनसीसी ग्रुप मुख्यालयांचे प्रतिनिधित्व करणाऱ्या या तुकडीत १०४ नवल विंग, १४ आर्मी विंग आणि २ एअरफोर्स विंगच्या कॅडेट्सचा समावेश होता, ज्यातून तिन्ही सैन्य दलांची प्रभावी एकात्मता अधोरेखित झाली. या संपूर्ण शिबिरादरम्यान कॅडेट्सना २७ फूट लांबीच्या ‘डीके व्हेलर’ बोटींच्या साहाय्याने समुद्रातील लाटांवर नौकानयन, रोईंग आणि संकटकालीन जीवनरक्षणाचे प्रत्यक्ष प्रात्यक्षिकांसह प्रशिक्षण देण्यात आले. तसेच त्यांच्यातील धैर्य आणि साहसी वृत्तीला वाव देण्यासाठी रॅपलिंग आणि समुद्रातील पॅरासेलिंगसारख्या आव्हानात्मक क्रीडा प्रकारांचाही यात समावेश होता.
या खडतर प्रशिक्षणात चमकदार कामगिरी करणाऱ्या १२० पैकी ६० निवडक कॅडेट्सची आता मुख्य ‘मेन्यू २७’ सागरी नौकावहन मोहिमेसाठी निवड करण्यात आली आहे. ही मोहीम रत्नागिरी ते पालशेत आणि परतीचा असा तब्बल २५० किलोमीटरचा सागरी प्रवास २७ फूट डीके व्हेलर बोटींच्या माध्यमातून पूर्ण करणार आहे. २१ ऑक्टोबरला कॅडेट्सचे रत्नागिरीत आगमन झाल्यानंतर २२ ऑक्टोबर रोजी भगवती जेट्टी येथून या मोहिमेला हिरवा झेंडा दाखवला जाईल. त्यानंतर जयगड, तवसाळ, बोऱ्या बंदर आणि पालशेत जेट्टी असा प्रवास करून ३१ ऑक्टोबर रोजी भगवती जेट्टी येथे या मोहिमेचा सांगता समारंभ होणार आहे.
केवळ समुद्राच्या लाटांवर मात करणे एवढाच या मोहिमेचा उद्देश नसून, ‘कोकण ज्ञान तरंग’ या संकल्पनेवर आधारित ही मोहीम किनारपट्टीवर सामाजिक प्रबोधनाची नवी लाट निर्माण करणार आहे. ज्ञान आणि प्रगतीची धरून कास, आदर्श कोकणाचा करूया विकास या ब्रीदवाक्यानुसार, २५० किलोमीटरच्या सागरी प्रवासादरम्यान ठिकठिकाणच्या बंदरांवर कॅडेट्स पथनाट्यांचे सादरीकरण करणार आहेत. या माध्यमातून प्रत्येक बालकासाठी सक्तीचे शिक्षण आणि महिलांचे शिक्षण व सक्षमीकरण याविषयी किनारपट्टी भागातील जनतेमध्ये व्यापक जनजागृती निर्माण केली जाईल. या मोहिमेच्या पूर्वतयारीचा एक भाग म्हणून सर्व कॅडेट्सची स्थानिक मत्स्यालय आणि खाडीतील खारफुटी परिसंस्थेला शैक्षणिक भेट घडवून आणण्यात आली. सागरी जैवविविधता व पर्यावरण संवर्धनाची माहिती कॅडेट्सना दिल्याबद्दल एनसीसी निर्देशालयाच्या वतीने शिरगाव येथील फिशरीज पॉलिटेक्निक इंजिनिअरिंग कॉलेज आणि आसामंत फाउंडेशनचे आभार मानण्यात आले असून, खडतर प्रशिक्षण व उच्च मनोबलाच्या बळावर सज्ज झालेले एनसीसीचे हे तरुण सागरी दूत आता कोकण किनारपट्टीवर ऐतिहासिक मोहिमेसाठी सज्ज झाले आहेत.
