रत्नागिरी (वैभव पवार) : आधुनिक मराठी कवितेचे जनक, क्रांतीदर्शी कविवर्य केशवसुत यांच्या जयंतीनिमित्त त्यांच्या जन्मगावी, मालगुंड येथील कवी केशवसुत स्मारकात विविध उपक्रमांनी त्यांना विनम्र अभिवादन करण्यात आले. कवी केशवसुत स्मारक व्यवस्थापन समिती आणि कोकण मराठी साहित्य परिषद (कोमसाप) मालगुंड शाखा यांच्या संयुक्त विद्यमाने या विशेष कार्यक्रमाचे आयोजन करण्यात आले होते.
कार्यक्रमाच्या प्रारंभी मान्यवरांच्या हस्ते केशवसुतांच्या पूर्णाकृती पुतळ्याला पुष्पहार अर्पण करून आणि दीपप्रज्वलन करून आदरांजली वाहण्यात आली. यावेळी ‘कोमसाप’ मालगुंड शाखेच्या अध्यक्षा नलिनी खेर यांनी केशवसुतांच्या जीवनकार्याचा आणि त्यांच्या साहित्यातील क्रांतिकारक विचारांचा सविस्तर आढावा घेत उपस्थितांना मार्गदर्शन केले. केशवसुतांनी मराठी कवितेला पारंपरिकतेच्या चौकटीतून बाहेर काढून नवी दिशा दिली, असे सांगत त्यांनी कवींच्या सामाजिक आशयाच्या अजरामर कवितांचे सादरीकरणही केले. या काव्यसादरीकरणातून उपस्थितांना केशवसुतांच्या प्रखर लेखणीची पुन्हा एकदा प्रचिती आली.
या अभिवादन सभेला कवी केशवसुत स्मारक व्यवस्थापन समितीचे अध्यक्ष गजानन तथा आबा पाटील, ‘कोमसाप’च्या अध्यक्षा नलिनी खेर, सचिव विलास राणे, डॉ. संतोष केळकर, रामानंद लिमये, अरुण मोर्ये, शिरीष लिंगायत, शुभदा मुळ्ये, उज्वला बापट, रामभाऊ गराटे यांच्यासह स्मारक व्यवस्थापन समिती व कोमसापचे पदाधिकारी आणि कर्मचारी मोठ्या संख्येने उपस्थित होते. स्मारकाला भेट देण्यासाठी आलेल्या पर्यटकांनीही या कार्यक्रमात उत्स्फूर्त सहभाग घेत केशवसुतांच्या स्मृतींना अभिवादन केले आणि काव्यसादरीकरणाचा आनंद घेतला.
