जयगड (प्रतिनिधी) : जयगड-नांदिवडे मार्गावरील जेएसडब्ल्यू कामगार वसाहतीसमोर क्रेन हयगयीने व निष्काळजीपणे चालविल्याप्रकरणी चालकाविरुद्ध जयगड सागरी पोलिस ठाण्यात गुन्हा दाखल करण्यात आला आहे. ही घटना १८ सप्टेंबर २०२६ रोजी सायंकाळी ५.४० वाजण्याच्या सुमारास घडली.
याबाबत पोलिस शिपाई शिवम प्रकाश आंबुलकर यांनी फिर्याद दिली आहे. त्यानुसार दीप चंद्र हरिश्चंद्र विश्वकर्मा (वय २३, रा. रुधौली, सेमरियावां, संत कबीरनगर, उत्तर प्रदेश; सध्या रा. जेएसडब्ल्यू लेबर कॉलनी, नांदिवडे, ता. जि. रत्नागिरी) याच्याविरुद्ध गुन्हा दाखल करण्यात आला आहे.
पोलिस नोंदीनुसार, विश्वकर्मा याच्या ताब्यातील फ्राना क्रेन क्रमांक एमएच-०९/जीएम/७९५६ ही जेएसडब्ल्यू कामगार वसाहतीसमोरील रस्त्यावरून जयगड ते नांदिवडे मार्गाने जात होती. यावेळी रस्त्याची विशिष्ट परिस्थिती लक्षात न घेता क्रेन हयगयीने चालविल्याचे फिर्यादीत नमूद करण्यात आले आहे.
या प्रकरणी जयगड सागरी पोलिस ठाण्यात गुन्हा रजिस्टर क्रमांक ७३/२०२६ नुसार भारतीय न्यायसंहिता अधिनियम २०२३ मधील कलम २८१ अन्वये गुन्हा दाखल करण्यात आला आहे.
