हातकणंगले (प्रतिनिधी): कानामध्ये ब्लूटूथ इअरबड्स घालून रेल्वे रुळावरून चालणे एका १७ वर्षीय तरुणीच्या जीवावर बेतल्याची काळीज पिळवटून टाकणारी घटना हातकणंगले ग्रामीण रुग्णालयासमोरील रेल्वे मार्गावर बुधवारी सकाळी ११ वाजण्याच्या सुमारास घडली. वेगाने येणाऱ्या धनबाद एक्स्प्रेसच्या भीषण धडकेत अनुष्का संतोष पोवार (वय १७, रा. सुतार मळा, इचलकरंजी) ही विद्यार्थिनी जागीच ठार झाली. अवघ्या काही पावलांवर असलेल्या वर्गमैत्रिणींनी तिला वाचवण्यासाठी जिवाच्या आकांताने घातलेल्या सादाला कानातील इअरबड्समुळे प्रतिसाद मिळू शकला नाही आणि डोळ्यांदेखत घडलेल्या या अंगावर काटा आणणाऱ्या भीषण दृश्याने दोन मैत्रिणी घटनास्थळीच बेशुद्ध पडल्या. या दुर्दैवी दुर्घटनेने संपूर्ण परिसरात तीव्र हळहळ व्यक्त होत आहे.
कोरोची येथे आरोग्य परिचरचे (नर्सिंग) शिक्षण घेणारी अनुष्का आपल्या दोन वर्गमैत्रिणींसह हातकणंगले ग्रामीण रुग्णालय परिसरातील मैत्रिणींच्या भेटीसाठी आली होती. आनंदात वेळ घालवण्यासाठी निघालेल्या या तिघींपैकी अनुष्का रेल्वे रुळावरून पुढे चालत होती, तर तिच्या दोन्ही मैत्रिणी वीस-तीस फूट मागे चालत होत्या. त्याचवेळी मागून भरधाव वेगाने धनबाद एक्स्प्रेस येत असल्याचे पाहून मागून येणाऱ्या मैत्रिणींनी ‘अनुष्का… थांब!’ असा आक्रोश करत तिच्या दिशेने धाव घेतली. मात्र, दोन्ही कानांत इअरबड्स असल्याने अनुष्काला ना मैत्रिणींच्या ओरडण्याचा आवाज आला, ना पाठीमागून येणाऱ्या रेल्वेच्या धडधडीची जाणीव झाली. मैत्रिणी अवघ्या आठ-दहा फुटांच्या अंतरावर पोहोचल्या असतानाच एक्स्प्रेसची भीषण धडक अनुष्काला बसली आणि तिचा मृतदेह हवेत सुमारे ३० फूट उडून दूर फेकला गेला.
हा भीषण आघात इतका भयानक होता की, अनुष्काच्या रक्तामांसाचे शिंतोडे समोर धावणाऱ्या मैत्रिणींच्या अंगावर उडाले, ज्यामुळे प्रचंड मानसिक धक्का बसून त्या जागीच कोसळल्या व बेशुद्ध झाल्या. घटनेचे गांभीर्य लक्षात येताच ग्रामीण रुग्णालयातील जीवरक्षक स्वप्निल नरूटे यांनी तातडीने धाव घेत बेशुद्ध मैत्रिणींना उपचारासाठी रुग्णालयात दाखल केले. त्या शुद्धीवर आल्यानंतरच या अपघाताचा थरारक घटनाक्रम उघडकीस आला. दरम्यान, रुग्णालयासमोरील समाजकल्याण वसतिगृह परिसरात सुरक्षेसाठी रेल्वेने दोन्ही बाजूंस अर्धा किलोमीटर जाळी बसवली असली, तरी रुग्णालयाच्या बाजूला रूळ ओलांडण्यासाठी ठेवलेली दोन फुटांची मोकळी जागा अखेर या तरुणीसाठी काळ ठरली. हातकणंगले पोलिसांनी घटनास्थळी पोहोचून पंचनामा केला असून, शवविच्छेदनानंतर मृतदेह शोकाकुल नातेवाइकांच्या ताब्यात देण्यात आला आहे. या घटनेची नोंद पोलिसांत झाली असून पुढील तपास सुरू आहे.
