खेड: शिंगरी बौद्धवाडीत तरुणाची गळफास घेत आत्महत्या

खेड : तालुक्यातील शिंगरी बौद्धवाडी येथे ३५ वर्षीय तरुणाने राहत्या घरात गळफास घेतल्याची घटना उघडकीस आली. नातेवाईकांनी त्याला तातडीने खाली उतरवून उपचारासाठी कलंबणी उपजिल्हा रुग्णालयात दाखल केले; मात्र डॉक्टरांनी तपासून त्याला मृत घोषित केले.

महेश दगडू पवार (वय ३५, रा. शिंगरी बौद्धवाडी, ता. खेड, जि. रत्नागिरी) याने राहत्या घराच्या पत्र्याच्या चॅनेलला नायलॉनच्या दोरीच्या साहाय्याने गळफास घेतला.

२१ सप्टेंबर २०२६ रोजी सायंकाळपासून २२ सप्टेंबरच्या सकाळी १० वाजण्याच्या दरम्यान ही घटना घडल्याचे समोर आले.

घटना लक्षात आल्यानंतर नातेवाईकांनी महेश पवार याला तातडीने खाली उतरवले. त्यानंतर त्याला उपचारासाठी कलंबणी येथील उपजिल्हा रुग्णालयात दाखल करण्यात आले. मात्र तेथील वैद्यकीय अधिकाऱ्यांनी तपासणी करून त्याला मृत घोषित केले.

या घटनेची नोंद खेड पोलीस ठाण्यात अकस्मात मृत्यू क्रमांक ८२/२०२६ अन्वये बी.एन.एस.एस. कलम १९४ प्रमाणे करण्यात आली आहे. पुढील कार्यवाही खेड पोलीस करीत आहेत.