अप्पर पोलीस आयुक्त शैलेश बलकवडे यांच्या अध्यक्षतेखाली त्रिस्तरीय एसआयटी
मुंबई: मराठा आरक्षण आंदोलक मनोज जरांगे यांनी समोर आणलेल्या 500 कोटी रुपयांच्या कथित ऑडिओ क्लिपमुळे राज्यात मोठी खळबळ निर्माण झाली आहे.
आता या प्रकरणी मुख्यमंत्री देवेंद्र फडणवीस यांनी सखोल चौकशी करण्यासाठी मुंबई पोलीस आयुक्तांना विशेष तपास पथक (SIT) स्थापन करण्याचे निर्देश दिले आहेत. त्यानुसार अप्पर पोलीस आयुक्त शैलेश बलकवडे यांच्या अध्यक्षतेखाली त्रिस्तरीय एसआयटीची अधिकृत घोषणा करण्यात आली आहे.
मुख्यमंत्र्यांच्या आदेशानंतर मुंबई पोलिसांनी तातडीने कारवाई करत त्रिस्तरीय एसआयटीची स्थापना केली आहे. या समितीची संपूर्ण जबाबदारी अप्पर पोलीस आयुक्त शैलेश बलकवडे यांच्याकडे सोपवण्यात आली आहे. यामध्ये अध्यक्ष : शैलेश बलकवडे (अप्पर पोलीस आयुक्त), सदस्य : विजयकांत सागर (पोलीस उपायुक्त) आणि सदस्य : बजरंग बनसोडे (पोलीस उपायुक्त) यांचा समावेश आहे.
या ऑडिओ क्लिपमध्ये खासदार श्रीकांत शिंदे यांच्या माध्यमातून मनोज जरांगे यांना 500 कोटी रुपये देण्यात आल्याचा खळबळजनक दावा करण्यात आला होता. या ऑडिओ क्लिपची निष्पक्ष चौकशी करून त्यामागील सूत्रधारांचा चेहरा समोर आणावा, अशी मागणी जरांगे यांनी सरकारकडे केली होती.
चौकशीच्या मुळाशी जाणे गरजेचे – जरांगे
दरम्यान एसआयटीच्या स्थापनेनंतर जरांगेंनी पुन्हा एकदा राज्य सरकारवर जोरदार निशाणा साधला आहे. फक्त एसआयटी गठीत करून छक्के-पंजे खेळू नका, तर या चौकशीच्या मुळाशी जाणे गरजेचे आहे. तसेच ही ऑडिओ क्लिप कोणतीही एआय जनरेटेड नसून 100 टक्के खरी असल्याचा पुनरुच्चार त्यांनी केला. एवढी मोठी क्लिप एआयच्या माध्यमातून बनवताच येत नाही, असा दावाही त्यांनी केला. ते पुढे म्हणाले की, ही क्लिप संपूर्ण देशात व्हायरल होत आहे. या क्लिपमधील विचार अत्यंत विखारी असून हे प्लॅनिंग मोडीत काढले पाहिजे. एसआयटी प्रमुख शैलेश बलकवडे हे जालन्याचे एसपी राहिलेले आहेत, ते देवेंद्र फडणवीसांचे खास असले तरी त्यांचे काम निष्पक्ष असले पाहिजे. त्याचबरोबर त्यांनी एक खळबळजनक सवाल उपस्थित केला. एकनाथ शिंदे यांचे करिअर उद्ध्वस्त करण्याचा हा प्रयत्न होता का? शिंदे आणि फडणवीस यांच्यात मोठी खदखद आहे. जर या चौकशीच्या खोलात गेले तर फडणवीसांचाही गेम केला जाणार होता, हे उघड होईल, असं जरांगे म्हणाले.
