रत्नागिरी : तालुक्यातील पावस परिसरातील एका खासगी क्लिनिकमध्ये उपचारासाठी गेलेल्या २२ वर्षीय तरुणीचा डॉक्टरने तपासणीच्या बहाण्याने विनयभंग केल्याचा धक्कादायक प्रकार उघडकीस आला आहे. या प्रकरणी पीडित तरुणीच्या तक्रारीवरून पूर्णगड सागरी पोलीस ठाण्यात डॉ. समीर गिजबिले याच्या विरोधात विनयभंगाचा गुन्हा दाखल करण्यात आला असून या घटनेमुळे परिसरात तीव्र संताप व्यक्त होत आहे.
मिळालेल्या माहितीनुसार, संबंधित तरुणीला ६ ऑक्टोबरपासून सर्दी आणि तापाचा त्रास होत असल्याने ती उपचारासाठी डॉ. समीर गिजबिले यांच्या क्लिनिकमध्ये गेली होती. त्यावेळी डॉक्टरांनी तपासणी करून इंजेक्शन व औषधे दिल्यानंतर तिच्या प्रकृतीत सुधारणा झाली होती. त्यानंतर ९ ऑक्टोबर रोजी सकाळी ११ वाजण्याच्या सुमारास मासिक पाळीच्या त्रासावरील उपचारासाठी पीडिता आपल्या आईसोबत पुन्हा क्लिनिकमध्ये गेली. त्यावेळी तपासणी कक्षात एकटी असल्याचे पाहून डॉक्टरने गैरवर्तन करत तिचा विनयभंग केला.
घडलेल्या लज्जास्पद प्रकारानंतर भेदरलेल्या तरुणीने क्लिनिकबाहेर आल्यावर घडलेला सर्व प्रकार आपल्या आईला सांगितला. कुटुंबीयांशी सविस्तर चर्चा केल्यानंतर अखेर १६ ऑक्टोबर रोजी रात्री तरुणीने पूर्णगड सागरी पोलीस ठाण्यात जाऊन रीतसर फिर्याद दिली. पोलिसांनी पीडितेच्या तक्रारीवरून डॉ. समीर गिजबिले याच्यावर भारतीय न्याय संहितेच्या कलम ७५ नुसार गुन्हा नोंदवला असून, या गंभीर प्रकरणाचा पुढील तपास पोलीस अधिकारी ए. एम. कुबडे करत आहेत.
