चिपळूण : ड्युटी संपवून घरी जाणाऱ्या पत्नीवर पतीने काठीने हल्ला करून तिला गंभीर जखमी केल्याची घटना चिपळूण तालुक्यातील सती येथे घडली. याप्रकरणी महेंद्र हरिश्चंद्र डांगरे (वय ५५, रा. पोफळी, ता. चिपळूण) याच्याविरोधात चिपळूण पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, मानसी महेंद्र डांगरे (वय ४५, रा. सती सहारा बिल्डिंग, चिपळूण) या सती येथील चैतन्य क्लिनिकमध्ये ड्युटीवर होत्या. २३ सप्टेंबर रोजी रात्री सुमारे ९.१५ वाजता ड्युटी संपल्यानंतर त्या क्लिनिकच्या दरवाजासमोरून घरी जाण्यासाठी निघाल्या होत्या. त्याचवेळी त्यांचे पती महेंद्र डांगरे हे तोंडावर हेल्मेट घालून अचानक तेथे आले.
यावेळी महेंद्र डांगरे यांनी हातातील काठीने मानसी यांच्या डोक्यावर, उजव्या हातावर तसेच डाव्या मांडीवर मारहाण केली. या हल्ल्यात मानसी डांगरे यांना दुखापत झाली. घटनेनंतर याप्रकरणी त्यांनी चिपळूण पोलीस ठाण्यात तक्रार दाखल केली.
या तक्रारीवरून पोलिसांनी महेंद्र डांगरे यांच्याविरोधात गुन्हा रजिस्टर क्रमांक २९८/२०२६ नुसार भारतीय न्याय संहिता (BNS) २०२३ मधील कलम ११८(१) सह भादंवि कलम ३२४ अन्वये गुन्हा दाखल केला आहे. सदर गुन्हा २४ सप्टेंबर रोजी पहाटे १.५२ वाजता दाखल करण्यात आला असून, पुढील तपास चिपळूण पोलीस करीत आहेत.
