मुंबई: महाराष्ट्राची राजधानी मुंबईतील कुर्ला पश्चिम परिसरात बुधवारी दुपारी भरदिवसा झालेल्या गोळीबाराच्या घटनेने संपूर्ण शहरात एकच खळबळ उडाली आहे. व्ही. बी. नगर पोलीस ठाण्याच्या हद्दीतील माकडवाला कंपाउंड परिसरात दुपारी साडेबाराच्या सुमारास दुचाकीवरून आलेल्या हल्लेखोरांनी विनोद मल्लापा पवार (वय ४०) यांच्यावर तीन गोळ्या झाडल्या. या जीवघेण्या हल्ल्यात गंभीर जखमी झालेल्या विनोद पवार यांना तातडीने जवळच्या रुग्णालयात दाखल करण्यात आले, मात्र उपचार सुरू असताना त्यांचा मृत्यू झाला. गोळीबारानंतर आरोपी घटनास्थळावरून पसार झाले असून या घटनेमुळे परिसरात मोठे तणावाचे वातावरण निर्माण झाले आहे.
या घटनेनंतर मृत विनोद पवार यांच्या संतप्त नातेवाईकांनी कुर्ला पोलीस ठाण्याबाहेर ठिय्या आंदोलन करत प्रचंड आक्रोश व्यक्त केला. संशयित आरोपी नेहल पवार याला आमच्या ताब्यात द्यावे, अशी मागणी नातेवाईकांनी लावून धरली. तसेच एका महिला नातेवाईकाने थेट फोटो दाखवून या हत्येमागे चार आरोपी असल्याचा गंभीर दावा केला. यापूर्वीही त्यांचाच हात होता आणि आताही त्यांनीच हे कृत्य केले असून या प्रकरणाचा तपास सीबीआयकडे सोपवावा, अशी मागणी त्यांनी केली आहे. जोपर्यंत आरोपींचे एन्काउंटर होत नाही किंवा त्यांना फाशीची शिक्षा दिली जात नाही, तोपर्यंत आम्ही मृतदेहावर अंत्यसंस्कार करणार नाही आणि त्यासाठी वर्षभर पोलीस ठाण्यासमोर उभे राहावे लागले तरी चालेल, असा आक्रमक पवित्रा नातेवाईकांनी घेतला आहे.
दरम्यान, या प्रकरणाची माहिती देताना पोलीस अधिकाऱ्यांनी सांगितले की, दुचाकीवरून आलेल्या आरोपींनी पूर्ववैमनस्यातून हा खून केल्याचे प्राथमिक तपासात समोर आले आहे. व्ही. बी. नगर पोलीस ठाण्यात याप्रकरणी गुन्हा दाखल करण्याची प्रक्रिया सुरू करण्यात आली असून, प्राथमिकदृष्ट्या यामध्ये दोन आरोपींचा सहभाग दिसून येत आहे. फरार आरोपींच्या शोधासाठी पोलिसांची एकूण १२ पथके रवाना करण्यात आली असून तांत्रिक आणि प्रत्यक्ष पुराव्यांच्या आधारे सखोल तपास सुरू आहे. परिसरातील तणाव लक्षात घेता कायदा व सुव्यवस्था अबाधित राखण्यासाठी मोठा पोलीस बंदोबस्त तैनात करण्यात आला आहे.
