राजापूर (तुषार पाचलकर): शालेय जीवनात विद्यार्थ्यांचे आरोग्य सुदृढ राहावे आणि त्यांच्यात आरोग्याविषयी जागृती निर्माण व्हावी, या हेतूने महाराष्ट्र शासनाच्या आरोग्य विभागामार्फत जिजामाता विद्या मंदिर, रायपाटण येथे २३ ऑक्टोबर २०२६ रोजी सर्वसमावेशक शालेय आरोग्य तपासणी शिबिराचे यशस्वी आयोजन करण्यात आले. विद्यार्थ्यांच्या संभाव्य आरोग्यविषयक तक्रारींचे वेळेवर अचूक निदान होऊन गरजू बालकांना तातडीने योग्य ते उपचार उपलब्ध व्हावेत, या प्राथमिक उद्दिष्टाने ही विशेष मोहीम हाती घेण्यात आली होती.
या तपासणीदरम्यान राजापूर येथील ग्रामीण रुग्णालयाचे वैद्यकीय अधिकारी डॉ. शेंबवणेकर, ज्योती मासये आणि सौ. अनुश्री पावसकर यांनी उपस्थित राहून शाळेतील विद्यार्थ्यांची कसून शारीरिक तपासणी केली आणि आवश्यक ते वैद्यकीय मार्गदर्शन केले. याप्रसंगी विद्यालयाचे मुख्याध्यापक श्री. सुनील कुंभार, शिक्षकवृंद श्री. गौतम पांगरीकर, श्री. सिद्धांत सरफरे, श्रीम. सरीता कुरणे यांच्यासह शिक्षकेतर कर्मचारी संदीप कोलते व सुरेश कांबळे यांनी सक्रिय सहभाग नोंदवत सहकार्य केले. विद्यार्थ्यांचे आरोग्य उत्तम राखण्याच्या दृष्टीने आरोग्य विभागाचा हा उपक्रम अत्यंत उपयुक्त व महत्त्वपूर्ण ठरला.
