आमदार किरण सामंत यांच्या पाठपुराव्याला यश; पंचायत समिती सदस्य उमेश दादा पत्की यांच्या प्रयत्नांना यशस्वी फलित
माचाळ /सिकंदर फरास : लांजा तालुक्यातील माचाळ गावाच्या एसटी बससेवेची प्रतीक्षा अखेर संपली असून, स्वातंत्र्यानंतर प्रथमच गावापर्यंत एसटी बस धावणार असल्याने ग्रामस्थांमध्ये समाधानाचे वातावरण आहे. तब्बल ८० वर्षांच्या प्रतीक्षेनंतर माचाळच्या रस्त्यावर एसटी बस धावण्याचा मार्ग मोकळा झाला आहे. आमदार किरण सामंत यांच्याकडे करण्यात आलेल्या सातत्यपूर्ण पाठपुराव्याला यश आले असून, येत्या १ नोव्हेंबरपासून या मार्गावर एसटी बससेवा सुरू होणार आहे.
लांजा आणि साखरपा-चिंचुर्टी या एसटी बसफेऱ्यांचा माचाळपर्यंत विस्तार करण्यात यावा, अशी मागणी अनेक दिवसांपासून केली जात होती. मात्र, माचाळपर्यंत थेट एसटी बससेवा उपलब्ध नसल्याने गावातील शाळकरी विद्यार्थी, ग्रामस्थ आणि अन्य प्रवाशांना मोठ्या गैरसोयीचा सामना करावा लागत होता. बस पकडण्यासाठी विद्यार्थ्यांसह ग्रामस्थांना तब्बल सात ते आठ किलोमीटर अंतर पायी चालत चिंचुर्टी येथे जावे लागत होते. त्यामुळे वेळ आणि श्रम खर्ची पडत होते.
ग्रामस्थांची ही अडचण लक्षात घेऊन राजापूर-लांजा-साखरपा विधानसभा मतदारसंघाचे आमदार किरण सामंत यांच्याकडे बससेवा सुरू करण्यासाठी सातत्याने पाठपुरावा करण्यात आला. प्रभानवल्ली पंचायत समितीचे सदस्य उमेश दादा पत्की यांनीही या प्रश्नासाठी विशेष प्रयत्न केले. अखेर या प्रयत्नांना यश मिळाले असून, माचाळपर्यंत एसटी बसफेऱ्यांचा विस्तार करण्याचा निर्णय घेण्यात आला आहे.
नवीन वेळापत्रकानुसार, आता सकाळी ९ वाजून २० मिनिटांनी एसटी बस माचाळ येथे पोहोचणार आहे. या बससेवेमुळे विद्यार्थ्यांना शाळेत जाण्यासाठी तसेच ग्रामस्थ आणि इतर प्रवाशांना दैनंदिन प्रवासासाठी मोठा दिलासा मिळणार आहे. अनेक वर्षांपासून भेडसावणारी वाहतुकीची समस्या दूर होण्यास या सुविधेमुळे मदत होणार आहे.
माचाळपर्यंत एसटी बस सुरू करण्यासाठी पुढाकार घेतल्याबद्दल ग्रामस्थांकडून आमदार किरण सामंत आणि पंचायत समिती सदस्य उमेश दादा पत्की यांचे आभार व्यक्त करण्यात येत आहेत. स्वातंत्र्यानंतर प्रथमच गावापर्यंत एसटी बस पोहोचणार असल्याने माचाळच्या दळणवळणाच्या दृष्टीने हा महत्त्वाचा टप्पा मानला जात आहे.
