दिल्ली : केंद्रीय माध्यमिक शिक्षण मंडळाने (CBSE) २०२७ मध्ये होणाऱ्या दहावी आणि बारावीच्या बोर्ड परीक्षांचे वेळापत्रक जाहीर केले आहे. दोन्ही वर्गांच्या परीक्षा १६ फेब्रुवारी २०२७ पासून सुरू होणार असून दहावीची परीक्षा ९ मार्चपर्यंत, तर बारावीची परीक्षा ९ एप्रिलपर्यंत चालणार आहे. विशेष म्हणजे परीक्षा सुरू होण्याच्या तब्बल १०१ दिवस आधी मंडळाने परीक्षांचे वेळापत्रक उपलब्ध करून दिल्याने विद्यार्थ्यांना अभ्यासाचे नियोजन करण्यासाठी पुरेसा कालावधी मिळणार आहे.
CBSE ने जाहीर केलेल्या वेळापत्रकानुसार, सर्व लेखी परीक्षा सकाळी १०.३० वाजता सुरू होतील. परीक्षांच्या कालावधीनुसार काही विषयांचे पेपर दुपारी १२.३० वाजता, तर काही विषयांचे पेपर दुपारी १.३० वाजता संपतील. त्यामुळे विद्यार्थ्यांनी केवळ परीक्षेची तारीखच नव्हे, तर संबंधित विषयासाठी दिलेला कालावधीही तपासणे आवश्यक आहे.
दहावीच्या विद्यार्थ्यांसाठी १६ फेब्रुवारी रोजी चित्रकला विषयाच्या परीक्षेने सुरुवात होईल. १७ फेब्रुवारीला गणित (स्टँडर्ड आणि बेसिक), २२ फेब्रुवारीला विज्ञान, २६ फेब्रुवारीला इंग्रजी, २७ फेब्रुवारीला हिंदी व इतर भाषा, ३ मार्चला हिंदी कोर्स ए आणि बी, तर ८ मार्चला सामाजिक शास्त्राची परीक्षा होणार आहे. ९ मार्च रोजी काही भाषा आणि ऐच्छिक विषयांच्या परीक्षांसह दहावीच्या परीक्षांचा समारोप होईल. यंदा दहावीच्या स्तरावर एकूण ८३ विषयांच्या परीक्षा घेतल्या जाणार आहेत.
बारावीच्या परीक्षांनाही १६ फेब्रुवारीपासून प्रारंभ होणार असून पहिल्याच दिवशी भौतिकशास्त्राचा पेपर होईल. त्यानंतर २३ फेब्रुवारीला अकाउंटन्सी, २५ फेब्रुवारीला भूगोल, २७ फेब्रुवारीला रसायनशास्त्र, ५ मार्चला इंग्रजी कोअर आणि इंग्रजी इलेक्टिव्ह, तर ९ मार्चला गणित आणि अप्लाइड मॅथेमॅटिक्सची परीक्षा आयोजित करण्यात आली आहे. पुढील टप्प्यात १५ मार्चला अर्थशास्त्र, १९ मार्चला राज्यशास्त्र, २५ मार्चला जीवशास्त्र, २७ मार्चला इतिहास, ३० मार्चला समाजशास्त्र, २ एप्रिलला बिझनेस स्टडीज आणि ९ एप्रिलला रिटेल व वेब ॲप्लिकेशन्स या विषयांचे पेपर होणार आहेत. बारावीच्या विद्यार्थ्यांसाठी एकूण १२१ विषयांचे वेळापत्रक तयार करण्यात आले आहे.
मंडळाच्या आकडेवारीनुसार, यंदा दहावीच्या परीक्षेसाठी २६.५ लाखांहून अधिक विद्यार्थ्यांनी नोंदणी केली असून बारावीच्या परीक्षेसाठीही सुमारे १९.८ लाख विद्यार्थ्यांनी नोंदणी केली आहे. विद्यार्थ्यांनी निवडलेल्या विषयांची संख्या आणि त्यांचे वेगवेगळे संयोजन लक्षात घेऊन परीक्षा कार्यक्रम निश्चित करण्यात आला आहे. यासाठी ४० हजारांहून अधिक विषय संयोजनांचा विचार करण्यात आल्याचे मंडळाने स्पष्ट केले आहे. विद्यार्थ्यांच्या दोन विषयांच्या परीक्षा एकाच दिवशी येऊ नयेत, यासाठी वेळापत्रक आखताना विशेष खबरदारी घेण्यात आली आहे.
परीक्षांचे वेळापत्रक जाहीर झाल्यानंतर विद्यार्थ्यांना उर्वरित अभ्यासक्रम पूर्ण करणे, सराव परीक्षा देणे आणि महत्त्वाच्या विषयांची उजळणी यासाठी नियोजन करता येणार आहे. विद्यार्थ्यांनी CBSE च्या अधिकृत संकेतस्थळाला भेट देऊन आपल्या वर्गाची संपूर्ण डेटशीट तपासावी. संकेतस्थळावरील ‘Latest @ CBSE’ या विभागात Class 10th Date Sheet 2027 किंवा Class 12th Date Sheet 2027 या पर्यायावर क्लिक केल्यानंतर वेळापत्रकाची PDF डाउनलोड करता येईल.
परीक्षेला अद्याप काही महिने शिल्लक असले तरी वेळापत्रक जाहीर झाल्याने विद्यार्थ्यांच्या तयारीला आता निश्चित दिशा मिळणार आहे. प्रत्येक विषयाच्या परीक्षेची तारीख लक्षात घेऊन अभ्यासाचे वेळापत्रक तयार करणे आणि अधिकृत डेटशीटनुसारच परीक्षेची तयारी करणे विद्यार्थ्यांसाठी महत्त्वाचे ठरणार आहे.
