खेड : बनावट नोटांच्या आधारे विश्वास संपादन करून सराफी दुकानातून लाखो रुपयांचे दागिने घेऊन पसार होण्याचा प्रकार मुंबई-गोवा महामार्गालगत लोटे-घाणेखूंट येथे घडला आहे. सोमवारी दुपारी सुमारे पावणेएकच्या सुमारास दोन अज्ञात व्यक्तींनी सोनल ज्वेलर्स या दुकानात खरेदीदार असल्याचे भासवून दुकानदाराची तब्बल दोन लाख रुपयांची फसवणूक केली. तीन लाख रुपये असल्याचे भासवणारी पाचशे रुपयांच्या नोटांची सहा बंडले दुकानाच्या काउंटरवर ठेवून आरोपींनी दोन सोन्याच्या चेन हातोहात लंपास केल्या.
सोनगाव-माठवाडी (ता. खेड) येथील संतोष आदावडे यांच्या मालकीचे हे दुकान असून, घटनेच्या वेळी ते आणि त्यांचा भाचा दुकानात उपस्थित होते. याचदरम्यान दोन अनोळखी तरुण ग्राहक म्हणून दुकानात आले. त्यांनी सोन्याच्या चेन खरेदी करण्याची इच्छा व्यक्त केल्यानंतर आदावडे यांनी त्यांना विविध चेन दाखवल्या. त्यापैकी एक चेन मित्राला दाखवून येण्याच्या बहाण्याने एक तरुण दुकानाबाहेर गेला आणि काही वेळाने दुसऱ्या साथीदारासह परतला.
त्यानंतर दोघांनी दोन चेन खरेदी करण्याचे निश्चित केल्याचा आव आणत आपल्याकडील कॅरीबॅगमधून पाचशे रुपयांची सहा बंडले काढून काउंटरवर ठेवली. ही रक्कम तीन लाख रुपये असल्याचे सांगत, पैसे दुकानातच ठेवण्यास सांगून चेन मित्रांना दाखवून येतो, असे त्यांनी दुकानदाराला भासवले. त्यांच्या बोलण्यावर विश्वास ठेवून दुकानातून बाहेर जाण्यास संमती मिळताच दोघांनी दागिने सोबत घेतले आणि तेथून काढता पाय घेतला.
दरम्यान, दुकानाबाहेर उभ्या असलेल्या आदावडे यांच्या भाच्याला संशय आल्याने त्याने दोघांवर लक्ष ठेवले. मात्र, महामार्गावर आधीच उभ्या असलेल्या नंबरप्लेट नसलेल्या चारचाकी वाहनात बसून आरोपींनी मुंबईच्या दिशेने वेगाने पलायन केले. वाहनाचा क्रमांक उपलब्ध नसल्याने त्यांचा पाठलाग करूनही ठोस माहिती मिळवणे शक्य झाले नाही. यानंतर काउंटरवरील बॅग तपासली असता त्यातील नोटा बनावट असल्याचे उघड झाले. आपल्याला नियोजनबद्ध पद्धतीने गंडा घातल्याचे लक्षात येताच दुकानदाराला धक्का बसला.
घटनेची माहिती मिळताच लोटे पोलिसांनी घटनास्थळी पोहोचून पंचनामा केला. मात्र, दुकानात स्वतःचे सीसीटीव्ही कॅमेरे नसल्याने तपासात अडचणी निर्माण झाल्या आहेत. विशेष म्हणजे दुकान असलेल्या कॉम्प्लेक्समधील सीसीटीव्ही यंत्रणेतही मेमरी कार्ड नसल्याचे समोर आले आहे. त्यामुळे आरोपींच्या हालचालींचे चित्रण मिळवण्याचा मार्गही सध्या अडचणीचा ठरत आहे.
महामार्गालगतच्या गजबजलेल्या परिसरात दिवसाढवळ्या घडलेल्या या प्रकारामुळे व्यापारी वर्गात चिंतेचे वातावरण निर्माण झाले आहे. बनावट चलनी नोटांचा वापर करून सराफाची फसवणूक करणाऱ्या या दोघांचा शोध घेण्यासाठी लोटे पोलीस पुढील तपास करत आहेत.
