मुंबई (उदय दणदणे): महाराष्ट्राच्या समृद्ध लोकसंस्कृतीचा अविभाज्य भाग असलेल्या कलगी-तुरा शाहिरी परंपरेचे जतन आणि संवर्धन करण्यासाठी कलगी तुरा समाज उन्नती मंडळाने पुढाकार घेतला आहे. कलेच्या क्षेत्रात गेली साडेसहा दशके अखंड कार्यरत असलेल्या या मातृसंस्थेच्या वतीने शनिवार, १४ नोव्हेंबर २०२६ रोजी मुंबईतील दादर येथे शाहिरी लोककलावंतांसाठी विशेष प्रशिक्षण शिबिर आणि मुक्त संवादाचे आयोजन करण्यात आले आहे. शांताराम भाऊ फिलसे फाउंडेशनच्या सहकार्याने आयोजित हा मेळावा दादर पश्चिमेकडील सेनापती बापट मार्गावरील श्री संत सेना सभागृहात सायंकाळी चार ते रात्री आठ या वेळेत पार पडणार आहे.
‘काल, आज आणि उद्या’ या संकल्पनेवर आधारित असलेल्या या एकदिवसीय शिबिरात कलगी-तुरा परंपरेतील विविध घटकांचे सखोल मार्गदर्शन केले जाणार आहे. यामध्ये गण, गौळण व पद्यांचा समावेश असलेला कविता विभाग, पारंपरिक जाखडी नृत्य आणि रंगबाजी अशा प्रमुख अंगांचे शास्त्रोक्त प्रशिक्षण दिले जाईल. केवळ सादरीकरणापुरते मर्यादित न राहता, कलगी-तुरा परंपरेचा मूळ गाभा टिकवून हा वारसा नव्या पिढीपर्यंत कसा पोहोचवावा, यावरही मार्गदर्शन केले जाणार आहे.
प्रशिक्षणासोबतच शाहिरी कलेसमोरील सद्यस्थिती आणि आव्हानांवर मात करण्यासाठी विचारमंथन सत्राचे आयोजन करण्यात आले आहे. या मुक्त संवादात कलगी-तुरा लोककलेचा वारसा, कलाकारांचे रोजचे प्रश्न, आर्थिक स्थैर्य आणि कलेचा आधुनिक संदर्भातील विकास या विषयांवर नामवंत अभ्यासक, वस्ताद आणि ज्येष्ठ शाहीर चर्चा करणार आहेत. या सामूहिक मंथनातून लोककलेच्या उज्ज्वल भविष्यासाठी ठोस दिशा ठरवली जाणार आहे.
कार्यक्रमासाठी उपस्थित राहणाऱ्या कलाकारांची आणि पाहुण्यांची गैरसोय होऊ नये म्हणून जेवणाची व्यवस्था करण्यात आली असून, सायंकाळी सहा वाजेपर्यंत उपस्थित राहणाऱ्या प्रतिनिधींना भोजन कुपन दिली जाणार आहेत. या ऐतिहासिक मेळाव्यास राज्यातील सर्व शाहीर, कलावंत, मार्गदर्शक, अभ्यासक आणि लोककला रसिकांनी मोठ्या संख्येने उपस्थित राहावे, असे आवाहन मंडळाचे अध्यक्ष सुरेश ऐनारकर, सरचिटणीस संतोष धारशे आणि खजिनदार सत्यवान यादव यांनी केले आहे. शिबिराच्या अधिक माहितीसाठी व पूर्वनोंदणीसाठी चिटणीस दिलीप नामे (७०२१४ ५२३०५)यांच्याशी संपर्क साधण्याचे आवाहन संयोजकांनी केले आहे.
